Ինչպես հայտնի է, Արցախում երկուշաբթի՝ փետրվարի 20-ին, սահմանադրական փոփոխությունների հանրաքվեն էր անցկացվում: Երեքշաբթի Արցախի Հանրապետության Հանրաքվեի կենտրոնական հանձնաժողովի նախագահ Սրբուհի Արզումանյանը ներկայացրեց քվեարկության նախնական արդյունքները: Վերջնական արդյունքները կհրապարակվեն հինգշաբթի՝ փետրվարի 23-ին:
Սրբուհի Արզումանյանն ասաց, որ հանրաքվեի դրված հարցը ընդունված է համարվում, երբ կողմ է քվեարկել ընտրության իրավունք ունեցող քաղաքացիների կեսից ավելին, բայց ոչ պակաս, քան 1/3-ը, այսինքն՝ 33 տոկոսի դեպքում էլ այն ընդունված կհամարվեր: Քվեարկությանը մասնակցել է ընտրելու իրավունք ունեցող քաղաքացիների 76.5 տոկոսը:
Ըստ նախնական տվյալների, սահմանադրական փոփոխություններին կողմ է քվեարկել 69 540 ընտրող, այսինքն՝ ընտրած քաղաքացիների 87.6 տոկոսը: Դեմ է քվեարկել 7686 ընտրող, քվեարկած քաղաքացիների՝ 9.7 տոկոսը: Անվավեր է ճանաչվել 2202 քվեաթերթիկ, այսինքն՝ 2.8 տոկոսը:
«Կարող ենք արձանագրել, որ հանրաքվեի հարցը համարվել է ընդունված, այսինքն՝ Սահմանադրության նախագիծը ընդունվել է»,- ասաց hանրաքվեի կենտրոնական հանձնաժողովի նախագահը: Նա նաեւ հավելեց, որ հանրաքվեին ամենաակտիվ մասնակցությունը գրանցվել է Քաշաթաղի շրջանում, ամենապասիվը՝ Ստեփանակերտում, ինչը Սրբուհի Արզումանյանը պայմանավորում է տարածքով:
Կարդացեք նաև
Ամի ՉԻՉԱԿՅԱՆ
