Լեռնային Ղարաբաղի Հանրապետությունում սահմանադրական փոփոխությունների հանրաքվե է: Քվեարկություն կատարեց Արցախի վարչապետ Արայիկ Հարությունյանը:
Քվեարկությունից հետո նա լրագրողների հետ զրույցում ասաց, որ անձնագիրը ներկայացնելիս հիշեց 1988 թվականի փետրվարի 20-ը. «Իհարկե՛, երազում էինք ունենալ անձնագիր: Այսօր ոչ միայն անձնագիր ունենք, այլ այդ անձնագրով վկայություն ենք բերում, որ արդեն ունենք ձեւավորած հանրապետություն, ձեւավորված երկիր եւ ամենակարեւորը՝ այդ երկիրը գնում է սահմանադրական բարեփոխումների՝ նպատակ ունենալով ժողովրդավարության արժեքներն ավելի խորն ամրապնդել մեր երկրում»:
Անդրադառնալով միջազգային հանրության հայտարարություններին, թե չեն ճանաչելու արդյունքները, Արայիկ Հարությունյանը պատասխանեց. «1988 թվականի փետրվարի 20-ին գիտակցում էինք, որ միջազգային հանրության հետ շատ խնդիրներ ենք ունենալու: Ամենակարեւորն այն է, որ մենք այս սահմանադրական փոփոխություններն անում ենք առաջին հերթին մեզ համար: Մեր ժողովրդի համար, որպեսզի կարողանանք կառուցել այնպիսի երկիր, որտեղ ապրելը հաճելի լինի»:
Արայիկ Հարությունյանի խոսքերով՝ Սահմանադրության նոր տարբերակը ոչ մի եվրոպական սահմանադրության չի զիջում, պարզապես այն պետք է ուսումնասիրել. «Այդպիսի բան չկա, որ իշխանությունը գերկենտրոնացված է մեկ անձի շուրջ, պետք է Սահմանադրությունը կարդալ»:
Կարդացեք նաև
ԼՂՀ վարչապետը նշեց, որ կիսանախագահական մոդելն ունի քաղաքական վտանգներ. «Այդ վտանգներից խուսափելու համար մենք ընտրել ենք այս մոդելը: Այսինքն՝ մոդել, որտեղ ինչքան հնարավոր է պետք է խուսափել քաղաքական ռիսկերից: Ժողովրդին պետք է ավելի մեծ լիազորություն տալ, եւ ժողովրդի ընտրությամբ պետք է կառավարման մոդելը ավելի հեշտ փոփոխվի: Գործող մոդելը՝ կիսանախագահական մոդելը, դա թույլ չի տալիս: Առաջարկվող մոդելը շատ ժողովրդավարական է, խորհրդարանականության բոլոր կարեւոր պայմանները նախատեսող, որն ունի նախագահ, որը գործադիրի ղեկավարն է: Բայց դա չի նշանակում, որ գերկենտրոնացվածություն է մեկ անձի շուրջ»:
Ամի ՉԻՉԱԿՅԱՆ
