ՀՀ վարչապետ Կարեն Կարապետյանի որոշմամբ այսօր Շիրակի մարզի փոխմարզպետների թիվն ավելացել է ևս մեկով՝ 2-ի փոխարեն դառնալով 3։ Փոխմարզպետ նշանակվել է Արթիկի նախկին քաղաքապետ, «Գազպրոմ Արմենիա» ընկերության Արթիկի մասնաճյուղի ղեկավար Խաչատուր Վարագյանը։
Վերջինս մեզ հետ զրույցում հաստատեց փոխմարզպետ նշանակվելու մասին տեղեկությունը՝ նշելով, որ դուրս է եկել ՀՀԿ-ի շարքերից։ Թե ի՞նչ պատճառաբանությամբ է դուրս եկել ՀՀԿ-ի շարքերից, մեր հարցին ի պատասխան՝ Խաչատուր Վարագյանն ասաց՝ պատճառաբանություն չկա, ցանկությունս է եղել, դուրս եմ եկել։
Հարցին՝ ՀՅԴ-ի վարկանիշային ցուցակով մասնակցելո՞ւ եք ընտրությունների, Խաչատուր Վարագյանն ասաց․ «Այո, նրանց կողմից եղել է առաջարկ, ես էլ համաձայնել եմ»։
Հիշեցնենք, որ տևական ժամանակ է՝ Շիրակի մարզում շրջանառվում են այն լուրերը, որ Շիրակի մարզպետ Հովսեփ Սիմոնյանը շահագրգռված է փոխմարզպետի երրորդ հաստիք բերել Խաչատուր Վարագյանի համար, քանի որ ՀՀԿ-ից նեղացած Վարագյանը ՀՅԴ-ին խոստացել է 10 հազար ձայն բերել ԱԺ ընտրությունների ժամանակ։
Կարդացեք նաև
Շիրակի մարզպետը, թերևս, չկարողացավ աշխատանքից ազատել տալ ՀՀԿ-ական փոխմարզպետներից որևէ մեկին, որպեսզի պարոն Վարագյանին նրանց փոխարեն տեղավորի աշխատանքի, սակայն կարողացավ օպտիմալացման այս պայմաններում երրորդ փոխմարզպետի հաստիքը ստեղծել Շիրակի մարզում։
Հիշեցնենք, սակայն, որ Վարագյանների մեծ եղբայրը՝ մեծահարուստ Դավիթ Վարագյանը, որը բնակվում է Ղազախստանում, մտերմիկ կապեր ունի ոչ միայն Նուրսուլթան Նազարբաևի, այլ ՀՀ ու ՌԴ ղեկավարության հետ։ Չի բացառվում, որ այս հարցում եղբորը օգնած լինի Դավիթ Վարագյանը։
Հիշեցնենք նաև, որ Վարագյան եղբայրները նեղված են տեղի ՀՀԿ պատասխանատուներից․ նախ այն պատճառով, որ Արթիկի ՏԻՄ ընտրություններում ՀՀԿ առաջադրեց նախկին ԲՀԿ-ական Մուշեղ Պետոյանի թեկնածությունը, իսկ Մխիթար Վարագյանը ինքնառաջադրվեց՝ դառնալով Արթիկի քաղաքապետ: Բացի այդ, ՀՀԿ տեղի պատասխանատուները, վերջերս այցելելով Խաչատուր Վարագյանի ղեկավարած գազի գրասենյակ, աշխատակիցներին հորդորել էին ԱԺ ընտրություններում իրենց ձայնը տալ ՀՀԿ-ի վարկանիշային ցուցակով առաջադրված Մուշեղ Պետոյանին:
Նունե ԱՐԵՎՇԱՏՅԱՆ
