Քաղաքական եւ ընտրական տեխնոլոգիաների փորձագետ Արմեն Բադալյանն այսօր «Հայացք» մամուլի ակումբում խոսեց առաջիկա ընտրություններին մասնակցելու հայտ ներկայացրած քաղաքական ուժերի ցուցակների եւ դրանցում պարունակվող հանրությանն ուղղված քաղաքական ուղերձների մասին:
Մասնավորապես, անդրադառնալով ՀՀԿ-ի ցուցակներին՝ Արմեն Բադալյանը զարմանք արտահայտեց, որ այն գլխավորում է պաշտպանության նախարար Վիգեն Սարգսյանը: «Պաշտպանության նախարարն ընդամենը 3-4 ամիս առաջ է մտել Հանրապետական կուսակցություն, այն էլ՝ նախարար դառնալուց հետո: Արեւմուտքում նման դեպքերում ցուցակը գլխավորում են այն անձինք, որոնք երկար ժամանակ աշխատել են կուսակցության համար եւ մեծ ներդրում ունեն տվյալ կուսակցության կայացման եւ հզորացման գործում: Այս սկզբունքը ՀՀԿ-ի դեպքում չպահպանվեց: Բայց ինչո՞ւ՝ նա: Նայելով Հանրապետականի մեծամասնական եւ ռեյտինգային ցուցակներին՝ գալիս ենք եզրակացության, որ այն ամենայն հավանականությամբ միայն իր ցանկությամբ կազմել է հանրապետության նախագահը՝ առանց կուսակցության այլ գործիչների տեսակետները հաշվի առնելու: Դրա համար նա ուներ լուծելու մի քանի խնդիր. իշխանության համակարգում ուժեղացնելով իր թիմակից պաշտպանության նախարարի դիրքերը՝ անուղղակիորեն թուլացնել վարչապետի դիրքերը:
Գաղտնիք չէ, որ վարչապետի գալով հասարակությունը նրանից մեծ սպասելիքներ ուներ: Նրան բոնուսային կարգով տրվեց Պետեկամուտների կոմիտեն, ՀՀԿ նախագահի 1-ին տեղակալի պաշտոնը, որի արդյունքում Կարեն Կարապետյանը իշխանական համակարգում գրեթե հավասարվեց գործող նախագահին: Սա, բնականաբար, դուր չէր գա նախագահին եւ նա այս ցուցակով լուծեց խնդիրներից մեկը՝ թուլացնել վարչապետի քաղաքական կշիռը՝ փորձելով հավասարեցնել այդ երկու գործիչներին:
Երկրորդը ցուցակի 1-3-րդ տեղերն զբաղեցնողներն են՝ Երեւանի քաղաքապետ Տարոն Մարգարյանը եւ Արդարադատության նախարար Արփինե Հովհաննիսյանը, որոնց միանշանակ կարելի է համարել նախագահի թիմակիցներ: Իսկ երբ նայում ես 4-10-րդ տեղերին, այնտեղ նույնպես վարչապետի թիմակիցներ չկան:
Կարդացեք նաև
Նույնը ռեյտինգային ցուցակում է, որտեղ հիմնականում օդիոզ դեմքեր են, հիմնականում՝ նախագահի թիմակիցներ: Հետեւաբար, խնդիրը դրված է հետեւյալ սկզբունքով. ապագա խորհրդարանում ՀՀԿ խմբակցությունը միանշանակ դարձնել հանրապետության նախագահի ենթակա խմբակցություն:
Երրորդ մեսիջը. առաջին տասնյակում նախկին երիտհանրապետականներին եւ այն մարդկանց ընդգրկելն էր, որոնց քաղաքական կարիերան անմիջականորեն կախված է նախագահից: Այնտեղ եւս հին հանրապետականներ չկան: Այսինքն, կուսակցության մեջ կատարել ուժերի վերադասավորում՝ հնաբնակներին մղելով երկրորդ պլան, որպեսզի ապագա խորհրդարանում նոր Հովիկ Աբրահամյանի նման ինքնուրույն գործիչներ չլինեն» :
Աշոտ ՀԱԿՈԲՅԱՆ
