Մշակութաբան և հրապարակախոս Արա Նեդոլյանի կանխատեսմամբ՝ առաջիկա ընտրություններին փոքր-ինչ դրական փոփոխություններ միգուցե լինեն:
«Նոյյան տապան» մամուլի սրահում պարոն Նեդոլյանը հայ հասարակության ապագայի, հետագա քաղաքական զարգացումների մասին որոշ մտահոգություններ հայտնեց. «Իրավիճակի արմատական փոփոխություն, իհարկե, անհնարին է առանց պատկերացնելու թե ինչէ դա նշանակում և ինչպես պետք է այդ փոփոխություններն իրականացնել»: Հրապարակախոսը հավաստիացրեց, որ կուսակցությունների ծրագրերից շատերը կարդացել է, սակայն դրանցում չկա փոփոխության գաղափարը, և չի հստակեցվում, թե ինչում է խնդիրը: Պարոն Նեդոլյանը հարց բարձրացրեց, թե, օրինակ, կուսակցությունների ծրագրերից հասկանալի չէ՝ որն է Հայոց բանակի խնդիրը, կամ որոնք են այդ խնդրի լուծումները:
Հրապարակախոսի համար անընդունելի է 18 տարեկանների՝ հարկադիր զինվորական ծառայությունը. «Երբ մահանում է կայացած տղամարդ, որը գիտակից որոշում է կայացրել լինել զինվորական և ով ստանում է մեծ գումար, այլ բան է: Բայց երիտասարդները չպետք է գնան ծառայության: Չպետք է լինի պարտադիր ծառայություն»:
Որպես նշված խնդիրների լուծում՝ հրապարակախոսն առաջարկում է. «Պետք է ստեղծել բաց, հանրային խմբեր՝ փորձագետների, ակտիվ քաղաքացիների և քաղաքական գործիչների մասնակցությամբ, որոնք կսկսեն այդ խնդիրները բարձրաձայնել և որոնել լուծումներ: Դա պետք է արվի ընտրություններից գոնե երկու տարի առաջ, ոչ մեկ ամիս առաջ, ինչպես այժմ»:
Կարդացեք նաև
Հարցին՝ ի՞նչ ազդեցություն կունենա հասարակական տրամադրությունների վրա այն փաստը, որ տարբեր ուժերի նախընտրական ցուցակներում հայտնվել են քաղաքացիական ակտիվիստներ, հրապարակախոսը պատասխանեց. «Ակտիվիստին կանչում են որպես դեմք, բրենդ, բայց ոչ գաղափարներ կրող»:
Ամփոփելով, պարոն Նեդոլյանը կարծիք հայտնեց, թե խնդիրները կլուծվեն, եթե ընտրողը չլինի պասիվ ունկնդրի դերում և չլսի ցանկացած հեքիաթ, որն իրեն պատմում են հավակնորդները ու ավելի հստակ ներկայացնի իր պահանջները:
Տաթև ՀԱՐՈՒԹՅՈՒՆՅԱՆ
