«Նախագահն այդ մասին շատ հստակ ասել է`ընտրություններին մասնակից ուժերը եթե համաձայնության գան»,-այսօր Կենտրոնական ընտրական հանձնաժողովում հրավիրված մամուլի ասուլիսում, լրագրողների հարցին` ընտրությունների օրը կհետաձգվի՞, թե` ոչ, այսպես պատասխանեց ԿԸՀ նախագահ Տիգրան Մուկուչյանը: Ընտրություններին մասնակից կուսակցությունների եւ դաշինքների գրանցումն ավարտվում է փետրվարի 26-ին: Ստացվում է, որ ամսի 26-ից հետո միայն կարելի է անդրադառնալ այդ հարցին:
Ամփոփելով կուսակցությունների եւ դաշինքների`երեկ ԿԸՀ ներկայացրած փաստաթղթերը, ԿԸՀ նախագահն ասաց, որ 5 կուսակցությունների եւ 4 դաշինքների տարածքային ցուցակներում ընդգրկված է 1539 քաղաքացի: Տարածքային ցուցակներով ընտրություններում առաջադրված ամենաշատ քաղաքացիները Կոտայքի մարզում են` 110, ամենաքիչը`Արագածոտնի եւ Տավուշի մարզերում`60-ական քաղաքացի:
Ասուլիսում Տիգրան Մուկուչյանը, ՀՀ Կառավարության աշխատակազմի ղեկավար-նախարար Դավիթ Հարությունյանը և ՀՀ-ում ՄԱԿ-ի մշտական համակարգող և ՄԱԶԾ մշտական ներկայացուցիչ Բրեդլի Բուզետտոն ներկայացրեցին փետրվարի 12-ին Գեղարքունիքի մարզի Սեմյոնովկա և Արմավիրի մարզի Վարդանաշեն համայնքներում կայացած ՏԻՄ ընտրությունների ժամանակ ընտրողների էլեկտրոնային գրանցում իրականացնող տեխնիկական սարքավորումների փորձարկման արդյունքները:
Բանախոսները վստահ են` ապրիլի 2-ի խորհրդարանական ընտրությունները կլինեն որակապես նոր մակարդակի՝ կիրառվող նոր սարքավորումների օգնությամբ:
Կարդացեք նաև
Տիգրան Մուկուչյանը ներկայացրեց նոր քվեարկղը. «Նախատեսված է առանձին արկղ, որը հենց քվեատուփի մեջ է լինելու, դրա մեջ կլցվեն չքվեարկած քվեաթերթիկները: Նշյալ քվեախուցը լիարժեք ապահովելու է առանց կողմնակի ազդեցության քվեարկությունը»,-ասաց նա:
Անդրադառնալով Գեղարքունիքի մարզի Սեմյոնովկա և Արմավիրի մարզի Վարդանաշեն համայնքներում կայացած ՏԻՄ ընտրությունների ժամանակ ընտրողների էլեկտրոնային գրանցում իրականացնող տեխնիկական սարքավորումների փորձարկումից հետո առաջացած շտկումներին, Կառավարության աշխատակազմի ղեկավար-նախարար Դավիթ Հարությունյանն ասաց, որ առաջարկվել է կրկնաքվեարկության դեպքում նաև ձայնային ազդանշան լինի, որպեսզի ուշադրություն գրավի: Նախկինում միայն կարմիր լույս էր վառում: Ազդանշանը կլինի ոստիկանական մեքենայի ազդանշան:
Այլ մանրամասները` տեսանյութում
Դավիթ Հարությունյանը վստահեցրեց`թերությունները մինչեւ ապրիլի 2-ը կշտկվեն:
ՀՀ-ում ՄԱԿ-ի մշտական համակարգող և ՄԱԶԾ մշտական ներկայացուցիչ Բրեդլի Բուզետտոն իր խոսքում նկատեց` ոչ մի տեխնոլոգիա չի կարող վերացնել կեղծիքի հնարավորությունը, բայց սա շատ հզոր գործիք է. «Սա կօգնի քաղաքացիների վստահության բարձրացմանը`գործընթացի հանդեպ»: ՄԱԿ-ի նպատակը եղել է հենց օգնել հանրությանը` բարելավել վստահությունն այս ամբողջ գործընթացի հանդեպ: «Անցած կիրակի օրը շատ կարեւոր մղոնաքար անցանք այս սարքավորման փորձարկման առումով: Ապագայում էլ ջանալու ենք բարելավել այս գործընթացը»: ՄԱԿ-ի ներկայացուցիչը ողջունում է բոլորի ջանքերը`կառավարություն, ընդդիմություն, քաղհասարակություն, ֆինանսավորող կողմերին, պատրաստակամության համար:
Նելլի ԳՐԻԳՈՐՅԱՆ
