Հարավային Կորեայի ամենահարուստ գործարարներից մեկը, Samsung Electronics ընկերության փաստացի ղեկավար և փոխտնօրեն Լի Չժե Յոնը ձերբակալվել է՝ կապված նույն կոռուպցիոն սկանդալի հետ, որն ավելի վաղ հանգեցրել էր երկրի նախագահ Պակ Կին Հեի հրաժարականին, հաղորդում է BBC-ն:
Հունվարին Հարավային Կորեայի դատարանը մերժել էր Լի Չժե Յոնին ձերբակալելու հայցը, սակայն դրանից հետո դատարանի տրամադրության տակ նոր ապացույցներ են հայտնվել:
Լի Չժե Յոնը զբաղեցնում է Samsung-ի փոխտնօրենի պաշտոնը: Սակայն այն բանից հետո, երբ նրա հայրը՝ ընկերության նախագահ Լի Գոն Հին կաթված ստացավ, Լի Չժոն Յոնը փաստացիորեն համարվում է ընկերության ղեկավարը:
Նա մեղադրվում է այն բանում, որ անօրինական կերպով գումարներ է փոխանցել Չհվե Սուն Սիլի՝ Հարավային Կորեայի նախագահ Պակ Կին Հեի ընկերուհու հիմնադրամին: Լի Չժե Յոնը հերքում է իր դեմ առաջադրված մեղադրանքները:
Կարդացեք նաև
Ավելի վաղ քննությունը պարզել էր, որ Չհվե Սուն Սիլը անօրինական կերպով ստիպել է խոշոր բիզնեսներին բազմամիլիոնանոց հանգանակություններ կատարել իր հետ կապված երկու ոչ կառավարական հիմնադրամների: Հենց այդ հիմնադրամների գործերի քննության շրջանակներում էլ ծագել է կոռուպցիոն սկանդալը, որը հանգեցրել է նախագահի իմփիչմենթին:
«Մենք կանենք մեր ուժերի սահմաններում ամեն բան, որպեսզի առաջիկա դատական նիստերին կարողանանք հասնել արդարության»,- ասվում է Samsung Group-ի տարածած հաղորդագրության մեջ:
Հունվարին Լիին 22 ժամ հարցաքննել էին, սակայն քննությունը բավարար հիմքեր չէր գտել նրան ձերբակալելու համար:
Ըստ մեղադրանքի՝ Լին 41 մլրդ վոն (36 մլն դոլար) է փոխանցել Չհվե Սուն Սիլի հիմնադրամներից մեկին, որպեսզի կառավարությունը աչք փակի կորպորացիայում ղեկավարության ժառանգական փոխանցման վրա:
Քննությունը չի բացառում, որ նվիրատվությունը կարելի է գնահատել որպես կաշառք:
Պատրաստեց՝ Վիկտորյա ԱՆԴՐԵԱՍՅԱՆԸ
