ՀՀԿ նախընտրական համամասնական ցուցակում չկան այսօր ՀՀԿ-ական շատ պատգամավորներ, շատերն էլ ցածր հորիզոնականներում են: Aravot.am-ի տեղեկություններով 40-րդ տեղից ներքեւ հայտնված որոշ ՀՀԿ-ականներ ԱԺ-ում չեն հայտնվելու: Օրինակ` այսօրվա ԱԺ պետաիրավական հարցերի մշտական հանձնաժողովի նախագահ Հովհաննես Սահակյանը, որ ցուցակում 45-րդ է, աշխատանք է ստանալու գործադիրում:
Հովհաննես Սահակյանը պատգամավոր է 2009 թվականից: Մեր հետ զրույցում Սահակյանը առանց հստակ պաշտոններ եւ ոլորտներ նշելու, հաստատեց տեղեկությունը, որ գործադիր իշխանություն է դառնալու. «Այս անգամ ես կլինեմ ոչ թե խորհրդարանում՝ այլ գործադիր մարմնում։ Կարծում եմ իմ կատարած աշխատանքը, օրենսդիրում ութ տարիների փորձառությունը լրիվ հիմք են, որպեսզի իմ գործունեությունն այսուհետ շարունակեմ որևէ պետական պաշտոնում՝ նվիրված աշխատանքով ու գիտելիքներով կծառայեմ թե՛ հարազատ կուսակցությանը, և թե՛ պետականաշինության գնահատելի գործին»:
2012-ի խորհրդարանական ընտրություններում Հովհաննես Սահակյանը ՀՀԿ համամասնական ցուցակի 114-րդ համարն էր: Նրան չի հուսահատեցնում կամ հուզում 2017-ի ընտրացուցակում զբաղեցրած տեղը. «Սա ես չեմ համարում իմ աշխատանքի, փորձառության կամ նվիրումի գնահատականը, ինչպես որ դա շատերին է թվում առաջին հայացքից։ Ընտրացուցակում զբաղեցրած տասնյակների տեղերով չէ, որ ներկայացվածները պետք է իրենց կարևորությունը զգան ու հակառակում համոզվեն»։
Նելլի ԳՐԻԳՈՐՅԱՆ
