Արմեն Ռուստամյանը՝ «աջաբսանդալային»
դաշինքների եւ իշխանական համակարգը փշրելու մասին
ՀՅԴ-ն հայտարարել է, որ ընտրություններին գնում է առանձին ցուցակով եւ այսօր հրապարակելու է ՀՅԴ համամասնական եւ ռեյտինգային ընտրակարգով առաջադրվողների ցուցակները:
Խմբակցության ղեկավար Արմեն Ռուստամյանը վստահեցնում է, որ իրենք ամեն ընտրատարածքում էլ ունեն հեղինակություն վայելող մարդիկ, որոնց առաջադրելու են: «Առավոտի» հետ զրույցում հարցին՝ ասում են՝ բացի Հակոբ Մաթիլյանից, որն Արթիկում է հայտնի, ՀՅԴ-ն ուրիշ ազդեցիկ, հեղինակավոր մարդիկ չունի, որ ձայն հավաքեն, համաձա՞յն եք, նա պատասխանեց. «Համաձայն չեմ բացարձակապես: Հակոբ Մաթիլյանը, այո, շատ հարգված ընկեր է, բայց իր նման եւ իրենից էլ ոչ պակաս թափով մարդիկ կան, դաշնակցական նաեւ, որ տարբեր տեղերում առաջադրվելու են»:
Մեր դիտարկմանը, որ այդ ռեյտինգային ցուցակներում հիմնականում թաղային հեղինակությունների միջեւ է պայքարը, եւ ասում են՝ դուք այդպիսի «զոռբա» անդամներ, այդ պրոֆիլի մարդիկ չունեք, Արմեն Ռուստամյանը պատասխանեց. «Հեղինակությունները միայն զոռբայության վրա չեն:
Մարդիկ երկար տարիներ այդ թաղերում ապրել են, իրենց պահվածքով ձեռք են բերել ի վերջո, որոշակի հեղինակություն: Նաեւ մենք ունենք արդյունքներ՝ նախորդ ընտրությունների մասով, թե տվյալ թաղում այդ մարդը ինչքան ձայն է հավաքել, որ ՀՅԴ-ն ունեցել է, վերջին հաշվով դա նաեւ իր շնորհիվ է: Այս ամենը շատ օբյեկտիվ գնահատելու ձեւեր կան»:
Կարդացեք նաև
Արմեն Ռուստամյանն aravot.am-ին ասել էր, որ իրենք ընտրություններին ինքնանպատակ, պարզապես թիվ արձանագրելու համար չեն գնում, մեծամասնություն ձեւավորելու խնդիր էլ չեն դնում. «Մենք հստակ ծրագիր ունենք ու դրանով ենք առաջնորդվելու»: Մեր հարցին՝ այսինքն՝ իշխանափոխություն չե՞ք ուզում, ու եթե լուրջ տեղեր չունենաք ԱԺ-ում, ձեր ծրագիրն ինչպե՞ս եք իրականացնելու, նա պատասխանեց. «Մենք արդեն իշխանափոխության նախադրյալներն ամբողջությամբ ստեղծել ենք: Այսօր իշխանափոխություն արդեն տեղի է ունեցել՝ մեր այս փոփոխությունների արդյունքում: Մարդիկ դա չեն տեսնում ուղղակի: Երբ ընտրությունները հնարավորություն են տալիս իշխանափոխություն իրականացնելու, դա այն է, որին մենք ձգտել ենք: Այսօր եթե որեւէ մեկը չունի երաշխիք, որ միանձնյա կարող է մեծամասնություն ունենալ, բա դրանից լավ ընտրակա՞րգ, որը հնարավորություն է տալիս իշխանությունը փոխել:
Այսինքն՝ մենք մի համակարգ ենք փշրել, որը իշխանության վերարտադրման համակարգ է եղել»:
Մեր դիտարկմանը, որ իշխանական բուրգը կայուն է, որ ասում եք՝ փշրել ենք, որեւէ կերպ դա չի անդրադառնալու իշխանական բուրգի վրա, անհասկանալի է, թե ինչն եք փշրել, Արմեն Ռուստամյանը արձագանքեց. «Ո՞նց չի անդրադառնում, այսօր տեսեք՝ ինչ մրցապայքար է ծավալվելու, այսօր որեւէ մեկը երաշխավորված չի, թե ինչ ներկայություն կարող է ունենալ ԱԺ-ում, ինչպիսի համախմբումներ են կատարվում, միանում են դաշինքներ՝ աջաբսանդալային, որոնք հայտնի չի՝ ծրագրային իմաստով ինչ են, բայց խնդիր են տեսնում, որ չեն կարող առանձին գնալով հաղթահարել 5%-ը: Միանում են, որ միասին այդ 7%-ը իրար հետ կարողանան հաղթահարել: Իրական տեսնում են, որ ընտրությունների միջոցով ինչ-որ հարցեր պիտի լուծվեն այս երկրում, իսկ սա ամենալավ պայմանն է իշխանափոխություն իրականացնելու, հնարավորություն է՝ ի վերջո»:
Մեր դիտարկմանը, որ այս ընտրություններին նորից դեժավյու ենք ապրում՝ նույն մեթոդները կան՝ անձնագրերի հավաքում, ցուցակագրում, նույն մարդիկ են, հասարակությունը տեսնում է, որ ոչ մի բան էլ չի փոխվում, Արմեն Ռուստամյանը պատասխանեց. «Չէ, ընտրատարածքներում վստահաբար կարող ենք ասել, երաշխավորված կարող ենք ասել, որ ընտրակեղծիքները համարյա բացառված են: Այսինքն՝ մնացածը, որ վերաբերում է ընտրակաշառքին, այո, այդ մասը դժվար է լինելու վերահսկել, որովհետեւ կաշառք տվողն ու կաշառք վերցնողն իրար հետ հանցավոր համաձայնության մեջ են: Սա է մեր պրոբլեմը: Բայց սրանով միայն չի կարողացել իշխանությունը վերարտադրվել, սա էլ է փաստ: Բազմակի քվեարկություններ են եղել, որ այս խնդիրը լուծել են, ուրիշների, բացակաների տեղը քվեարկություններ, որի հարցը մենք լուծել ենք այս մեխանիզմով: Սա է, որ մեզ տալիս է վստահություն՝ ասելու, որ ընտրություններն այլեւս որոշիչ դեր ունեն իշխանությունների ձեւավորման խնդրում: Սրանք ամենալավ պայմաններն են, որին պետք է ձգտեն: Ոչ թե անպայման ես գամ իշխանության, այլ ես ստեղծեմ հնարավորություն, որ ժողովուրդն իր իշխանությունը որոշի»:
Մենք հետաքրքրվեցինք՝ Դուք ասում եք՝ ընտրությունները չեն կեղծվելու, բայց չե՞ք բացատրի՝ ինչի՞ համար են Արտակ Սարգսյանը՝ ՍԱՍ-ի Արտակը, Սամվել Ալեքսանյանը իրենց աշխատողների անձնագրային տվյալները հավաքում՝ արդեն ահազանգեր կան այդ մասին, դա ինչպե՞ս են օգտագործելու, նա պատասխանեց. «Դրանք անօրինական գործողություններ են, բայց մի մասն էլ ժողովրդի չիմացության վրա են աշխատում: Մարդկանց սրանով ցույց են տալիս, որ արդեն դու վերահսկված ես, որն իրականությանը չի համապատասխանում: Իհարկե, այս ընտրությունների նորարարությունները շատ են, շատերը պետք է նոր սովորեն, թե ինչպիսի ընտրության են գնալու, սրանից օգտվում են նաեւ այն մարդիկ, որ գիտեն՝ շատերը չեն խորանալու այս ամեն ինչի մեջ, փորձում են այս ամեն ինչը օգտագործեն՝ մարդկանց վախեցնեն: Մեր ժողովրդի մի զգալի մասն էլ իր չիմացության պատճառով հեշտությամբ տրվում է այդ մոտեցումներին, ու իրեն թվում է, թե ինքը վերահսկված է»:
ՀՌԻՓՍԻՄԵ ՋԵԲԵՋՅԱՆ
«Առավոտ»
15,02.2017
