«Ազատ դեմոկրատներ» կուսակցության ցուցակում Անահիտ Բախշյանը կլինի առաջին կին թեկնածուն: Այս մասին Aravot.am-ին ասաց կուսակցության խոսնակ Սոնա Մինասյանը: Ըստ նրա, ցուցակի վերաբերյալ ավելի մանրամասն կհրապարակեն վաղը:
«Ցանկացած մեկը, որն ունի ինքնագնահատական ու հետագիծ, անցել է որոշակի ճանապարհ, չի կարող չմտածել՝ ցուցակում անցողիկ տեղ ունենալու մասին: Այո՛, ինձ նույնպես հետաքրքիր է»,- ասաց տիկին Բախշյանը:
Մեր հարցին՝ ինչպես լուծվեցին ցուցակը գլխավորելու շուրջ տարաձայնությունները, տիկին Բախշյանն ասաց՝ ինքն այդ մասին մամուլից է տեղեկացել. «Ազատ դեմոկրատներն» է հիմքը, ճիշտ չէր լինի, որ այդ կուսակցության ղեկավարը չգլխավորեր ցուցակը: Հրանտ Բագրատյանը երբեք չի մոռանում, որ ինքը վարչապետ է եղել, մենք էլ չենք մոռանում, ամբիցիաներ են, բայց որոնք մարդու մեջ խթանիչ ուժ են»,- ասաց Անահիտ Բախշյանը:
Արփինե ՍԻՄՈՆՅԱՆ
