«Ազատ դեմոկրատներ» կուսակցության վարչապետի թեկնածուն Հրանտ Բագրատյանն է: Այս մասին Aravot.am-ին հայտնեց կուսակցության խոսնակ Սոնա Մինասյանը: Ըստ նրա, ցուցակը գլխավորելու է Խաչատուր Քոքոբելյանը, իսկ ցուցակի երկրորդ տեղում՝ Հրանտ Բագրատյանն է:
Մեր հարցին՝ տարաձայնություններ չկայի՞ն ցուցակը գլխավորելու հարցում, Սոնա Մինասյանն ասաց՝ նաեւ «Ազատություն» կուսակցության առաջարկով է ցուցակը գլխավորելու հենց պարոն Քոքոբելյանը:
«Հաշվի է առնվել, որ «Ազատ դեմոկրատներ» կուսակցությունն ունի հզոր կազմակերպչական ռեսուրսներ: Մենք ընտրություններին մասնակցելու ենք «Ազատ դեմոկրատներ» կուսակցության համապետական ցուցակով՝ ստեղծելով յուրովի դաշինք, որտեղ իրենց ուրույն տեղն են ունենալու ե՛ւ «Ազատ դեմոկրատների», ե՛ւ «Ազատություն» կուսակցության անդամները, ինչպես նաեւ բոլոր անկուսակցական մարդիկ, որոնք կիսում են մեր գաղափարները, առաջ են քաշում մեր քաղաքական պլատֆորմը»,- ասաց Սոնա Մինասյանը:
Արփինե ՍԻՄՈՆՅԱՆ
