Aravot.am-ը ՀՅԴ խմբակցության ղեկավար Արմեն Ռուստամյանից հետաքրքրվեց՝ ձեզ իշխանական ուժ են դիտարկում, դա ձեր ընտրազանգվածի վրա չի՞ անդրադառնալու: Նա պատասխանեց. «Մենք չենք էլ մեր տեղը թաքցնում, բայց եթե չմտնեինք, այս պրոցեսները այս ուղղությամբ չէին գնա, չէ՞: Իշխանության մեջից պիտի բաներ փոխես այն երկրներում, որտեղ ավտորիտար ռեժիմը պետք է թոթափեն ու անցնեն ժողովրդավարական ռեժիմի: Մոռանում են, որ ավտորիտար ռեժիմներում ուրիշ ձեւ չի լինում փոփոխություն իրականացնելը: Դու պիտի մեջից մի բան անես: Մենք փորձեցինք դրսից անել, քառյակի հետ…չգնացին մեր ճանապարհով: Ու մենք գնացինք այս ճանապարհով ու հաջողեցինք: Երկու հիմնարար բան մենք փոխել ենք՝ արմատական փոփոխություններ՝ նոր որակի իշխանություն ձեւավորելու հարցում»:
Հարցին՝ այնուամենայնիվ, իշխանական ուժ դառնալը ձեր ընտրազանգվածի վրա չի՞ անդրադարձել՝ Արմեն Ռուստամյանը պատասխանեց. «Մեր էլեկտորատը կայուն էլեկտորատ է, գիտակից էլեկտորատն է: Մենք այն մարդկանց, ովքեր դժգոհում, բողոքում են իրենց չքավորության պատճառով, շատ լավ գիտենք, որ նաեւ վերջին պահին ազդվում են ընտրակաշառքից եւ արդեն դա մեր էլեկտորատը չի: Իրերին ճիշտ, բաց աչքերով նայենք: Ես ցավում եմ դրա համար, բայց իրականության մեջ այն մարդը, որը դժգոհ է իր կյանքից, ինքը գնում, նաեւ ձայն է տալիս նրան, ումից ինքը դժգոհում է, որովհետեւ ստացել է 5-10 հազար ընտրակաշառք ու վերջացավ: Հիմա այդ թվերը կարող է նաեւ մեծանան»:
Հռիփսիմե ՋԵԲԵՋՅԱՆ
