«Այդ երկու դաշինքներն էլ խնդիր ունեն ապացուցելու, թե իրենք ո՞վ են, քաղաքական դաշտում ի՞նչ կոորդինատ ունեն և ի՞նչ է իրենց ուզածը: Ի՞նչ նկատի ունեն, երբ ասում են, որ ընդդիմադիր են: Մենք վաղուց ամեն ինչ ապացուցել ենք, տեսնենք, թե իրենք ինչ կապացուցեն»,- այսօր լրագրողների հարցին ի պատասխան`հետընտրական համագործակցության հնարավորություններ տեսնո՞ւմ է «Օհանյան-Րաֆֆի-Օսկանյան» և «Ծառուկյան» դաշինքների հետ, ասաց «Ելք» դաշինքի երրորդ հորիզոնականը զբաղեցնող Նիկոլ Փաշինյանը:
Պաշտպանության նախկին նախարար Սեյրան Օհանյանը երեկ հայտարարել է, որ «մարտի մեկը» պետք է բացահայտվի, և որ Հայաստանում քաղբանտարկյալներ կան: «Գիտեք, վաղը նույն հայտարարությամբ հավանաբար հանդես կգա նաև Հովիկ Աբրահամյանը. ի՞նչ է դա փոխելու քաղաքական դաշտում: Մենք քաղբանտարկյալների մասին չենք խոսել մեր պաշտոնավարման ավարտից հետո, միշտ ենք խոսել»,- լրագրողների դիտարկմանն ի պատասխան ասաց Նիկոլ Փաշինյանը:
Նիկոլ Փաշինյանը հավանական է համարում, որ այդ երկու դաշինքները ընտրություններից հետո կոալիցիա կազմեն ՀՀԿ-ի հետ: Խոսելով Վարդան Օսկանյանի մասին, Նիկոլ Փաշինյանը հիշեց, որ ժամանակին նա Հայաստանում քաղբանտարկյալների առկայությունը աշխարհով մեկ արդարացնող թիվ մեկ գործիչն էր. «Վարդան Օսկանյանը Ռոբերտ Քոչարյանի Ռիբենտրոպն է»:
Խոսելով Գագիկ Ծառուկյանի`քաղաքականություն վերադարձի եւ «Ծառուկյան» դաշինքի մասին, Նիկոլ Փաշինյանն ասաց, որ երբ երկրում իրական իշխանափոխություն անելու հնարավորություն կար, վերոնշյալ դաշինքներում ներգրավված ուժերը ոչ թե աջակցեցին, այլ պարզապես փախան:
Կարդացեք նաև
Նիկոլ Փաշինյանը նաեւ հայտարարեց, որ «Ելք» դաշինքի քաղաքական ուժերից որևէ մեկը, որևէ ներկայացուցիչ ՀԱԿ-ի հետ դաշինք կազմելու կամ այլ բանակցություն չի վարել: «Ցավոք սրտի, այդ ակնհայտ սուտ տեղեկատվությունն անընդհատ շրջանառվում է»,- ասաց նա:
Այլ մանրամասները` տեսանյութում
Նելլի ԳՐԻԳՈՐՅԱՆ
