Քաղաքագետ Հրանտ Մելիք-Շահնազարյանի մեկնաբանմամբ ղարաբաղա-ադրբեջանական սահմանին զարգացումները դեռեւս բացասական ուղղությամբ են ընթանում, ու եթե այս միտումները շարունակական լինեն, միակ բանը, որ կարելի է սպասել՝ այս իրավիճակի պահպանումն է:
«Այսինքն, թույլ չտալ, որ սրանից ավելի սրանա իրավիճակը, քանի որ չկա բանակցային գործընթաց, միջնորդների հստակ դիրքորոշում, փոխարենը կա իրավիճակի սրում սահմանում»,- Aravot.am-ին ասաց քաղաքագետը:
Անցած տարի ապրիլի մեկին նախորդող շրջանում ու այս տարվա նույն ժամանակահատվածում ադրբեջանական գործողությունները քաղաքագետ Հրանտ Մելիք-Շահնազարյանի վերլուծությամբ, շատ նման են.
«Մեծանում է լարվածության աստիճանը, բայց երբեք խորհուրդ չէի տա դա ընկալել որպես ապրիլյան սցենարի կրկնության՝ այսպես ասած, ազդանշան: Այդ նույն պատերազմը կարող է այս անգամ սկսել ոչ թե ապրիլին, այլ փետրվարին կամ ավելի ուշ: Չպետք է կարծել՝ նույն սցենարն է կիրառվել եւ պետք է անընդհատ սպասել հնարավոր վատագույն զարգացումներին:
Կարդացեք նաև
Ավելի քան համոզված եմ՝ եթե Ադրբեջանը ունենար պատերազմը վերսկսելու պոտենցիալ, դա կաներ դեռեւս անցած տարվա վերջին, երբ պարզ դարձավ, որ միեւնույնն է բանակցային գործընթացից խուսափում է ու, ըստ էության, բանակցություններով, քաղաքական ճանապարհով չի կարող վերացնել ապրիլյան իր ձախողումների հետեւանքները:
Այսինքն, այս պատերազմը պետք է Ադրբեջանին բոլոր պարագաներում, բայց նա չունի բավականաչափ ռեսուրսներ պատերազմը սկսելու համար: Ես կարծում եմ, որ նա հիմա մեծացնելու է լարվածությունը՝ օգտագործելով թնդանոթներ սահմանում, որովհետեւ փորձում է պատերազմի իմիտացիա ստեղծել, ստեղծել մի իրավիճակ, երբ պատերազմն իրականում չկա, բայց դրա մասին բոլորը խոսում են: Այդ ճանապարհով փորձում են շտկել ապրիլյան պատերազմի հետեւանքները եւ հասնել նրան, որ ԵԱՀԿ Մինսկի խմբի անդամները կողմերին կառաջարկեն ամեն ինչ նորից սկսել»:
Արփինե ՍԻՄՈՆՅԱՆ
էս տղեն անցած տարի ես ժամանակ կոկորդ էր ճղում որ ադրբեջանը պատերազմի ռեսուրս չունի, բառացի ասում էր ինտերնետում բոլորը կան, հիմա տրամագծորեն հակառակն է ասում․․․ ոնց կարելի է սենց ախր, գոնե անհարմար է պետք զգալ, սա սխալ չի այլ բստրել է․․․․