Այսօր «Հայ կանանց» ճակատի անդամները մի տոպրակ հաց՝ «հարամ լինի ձեր հացը» գրառմամբ, փորձեցին մտցնել ՀՔԾ, բայց նրանց չհաջողվեց: Ոստիկաններն արգելեցին ու հրելով՝ դուրս հանեցին նրանց շենքից:
«Հայ կանանց» ճակատի անդամներն այսօր բողոքի ակցիա էին անցկացնում ՀՔԾ-ի շենքի դիմաց՝ ի պաշտպանություն «Սասնա ծռերին» «հաց տարած» Արթուր Սարգսյանի: Հիշեցնենք, որ նրան երեկ կանչել էին ՀՔԾ, ավելի ուշ դատարանի որոշմամբ, փոխել խափանման միջոցը եւ կրկին երկու ամսով կալանավորել:
Արթուր Սարգսյանը մեղադրվում է «Սասնա ծռերին» օժանդակելու համար:
«Այստեղ ենք, ուզում ենք՝ իշխանությունների բարոյազրկված դեմքը ցույց տալ, որ ժողովուրդը ոտքի կանգնի ու իր բողոքն արտահայտի»,- լրագրողներին ասաց ակցիայի մասնակից Սյուզան Սիմոնյանը:
Կարդացեք նաև
Դերասանուհի Թամար Հովհաննիսյանն էլ շարունակեց. «Ուզում եմ՝ այդ տղային ազատ արձակեն, որովհետեւ նրան կալանավորելու իրավունք չունեն, հիմքեր չունեն: Դեկտեմբերի 31-ին, երբ դուրս եկավ կալանավայրից, նա այնքան սեր ու գնահատանք տեսավ ժողովրդի կողմից»:
Տիկին Հովհաննիսյանի տվյալներով, նախընտրական շրջանում տարբեր քաղաքական ուժեր Արթուր Սարգսյանին առաջարկել են խորհրդարանական ընտրություններում իրենց ցուցակով թեկնածություն առաջադրել, բայց բոլորին մերժել է. «Որովհետեւ «Սասնա ծռերի» պես չի հավատում ընտրություններին: Մենք գիտենք՝ իր համար կռիվ էին տալիս, որ անցնի իրենց կողմը: Այդ մարդուն այդպիսի հիվանդություններով, նորից կալանավորելը անբարոյության գագաթնակետն է»:
Թե ինչու են Արթուր Սարգսյանին նորից կալանավորել հարցի պատասխանը տիկին Հովհաննիսյանին հայտնի է, ասաց. «Որ ապրիլի 2-ին 109 զոհված, մատաղ եղած երեխեքի օրը, գնան նորից նստեն էդ տեղերում, իրենց լափելիքը լափեն, դաշտն են մաքրում»:
Սյուզան Սիմոնյանն էլ պատմեց, որ հինգ օր առաջ էր խոսել Արթուր Սարգսյանի հետ ու տեղեկացել, որ իրեն վատ է զգում. «Համաձայնեցված պետք է ներկայանար երկուշաբթի, ինչո՞ւ են ձերբակալել, ո՞ւմ հրամանով են այս սրիկայություններին դիմում: Ի՞նչ է նշանակում սա, նա ընդամենը հաց է հասցրել սոված մարդկանց, դրա համար պետք է ձերբակալե՞լ»:
Արփինե ՍԻՄՈՆՅԱՆ
պարզապէս որպէս տեղեկատվության առարկայական ամբողջացում՝
https://www.aravot.am/2016/09/19/736960/
« Չնայած հանրության մեջ տարածված այն կարծիքին, թե օժանդակող Արթուր Սարգսյանի գործողություններն արտահայտվել են ընդամենը զինյալներին սնունդ հասցնելով, այնուամենայնիվ, կատարված նախաքննությամբ հիմնավորվել է, որ 2016թ. հուլիսի 26-ին ՊՊԾ գնդի տարածք մտնելուց հետո մինչև օգոստոսի 31-ն ընկած ժամանակահատվածում վերջինս կատարել է ինչպես զավթած տարածքն ու շենքերը, այնպես էլ պատանդառված բուժաշխատողներին պահելուն ուղղված ակտիվ գործողություններ: Մասնավորապես՝ Ա.Սարգսյանը կատարել է տարածք բերված բուժսարքավորումների, բուժաշխատողների բեռների ստուգում՝ իրավապահների կողմից ենթադրաբար տեղադրված գաղտնալսող սարքերի հայտնաբերման նպատակով, նորոգել է զինյալների կապի միջոցները, բացի այդ, անձամբ զինված իրականացրել է պատանդների պահպանությունը: »