Նախկին պատգամավոր Վիգեն Խաչատրյանը (գլխավոր լուսանկարում) տպավորություն ունի՝ ՀՀԿ-ականները զոմբիացած են հետեւում իրենց առաջնորդին, իսկ ընտրություններից թե՛ առաջ, թե՛ հետո «դիրիժորական փայտիկը» Սերժ Սարգսյանի ու Կարեն Կարապետյանի ձեռքին կմնա:
«Ընտրապայքարում կամ պետք է մրցակցել ՀՀԿ-ի հետ կամ օժանդակել: ՀՀԿ-ն մի կուսակցություն է, որը զոմբիացած հետեւում է Սերժ Սարգսյանին»,-այսօր «Հայելի» ակումբում ասաց Վիգեն Խաչատրյանը:
Նա ընդդիմության հաջողությունը միայն համախմբման մեջ է տեսնում. «Երբ ընդդիմադիր ուժերը միավորվեն, այդ ժամանակ կհասնեն հաջողության: Ի՞նչ գաղափարական պայքարի մասին է խոսքը, երբ երկրում ռեժիմ է: Պետք է ուժերը գան հատուկ Հայաստանի հանրապետական կուսակցությանը պաշտոնանկ անելու համար»:
Կարդացեք նաև
«Ազատ դեմոկրատներ» կուսակցության վարչության անդամ Արմեն Առաքելյանն էլ շարունակեց՝ ասելով, որ ձեւավորվող դաշինքները, կարծես թե, մարդկանց դրել են ամնեզիայով տառապող հիվանդների տեղ. «Միայն միամիտ մարդը կարող է մտածել, որ Գագիկ Ծառուկյանը, Սեյրան Օհանյանը ու Վարդան Օսկանյանը կարող են ընդդիմություն լինել»:
Նա նաեւ հավելեց, որ ընտրապայքարում չկա գաղափարական, քաղաքական պայքար. «Օհանյան-Օսկանյան դաշինքին անդրադառնալով` ասեմ, որ մարդիկ իշխանության մեջ լինելով չեն փորձել մատը մատին տալ, հիմա փոփոխություննե՞ր են ուզում: Իսկ «Ծառուկյան» դաշինքին անդրադառնալով ուզում եմ ասել, որ միայն միամիտ մարդը կարող է մտածել, որ Ծառուկյանն ընդդիմություն է… ես կասեի՝ Ծառուկյանն իշխանական պրոյեկտ է»:
Արփինե ՍԻՄՈՆՅԱՆ
