Այսօր լրագրողների հարցին՝ ի՞նչ դեմքով է ՀՀԿ-ն գնալու ընտրությունների, նորից Առաքել Մովսիսյա՞նը, Մհեր Սեդրակյա՞նը, այս դեմքերո՞վ՝ Վահրամ Բաղդասարյանը ԱԺ ճեպազրույցի ժամանակ պատասխանեց. «ՀՀԿ-ն գնալու է քաղաքական դեմքով»:
Նա կոչ արեց, որ մյուս ուժերն էլ իրենց ցուցակներում դնեն քաղաքական գործիչների, իսկ տարածքային ցուցակներում գտնվող մարդկանց գնահատականը պետք է տա հանրությունը. «Մարդկանց հիմնական դժգոհությունն այն է, որ պառլամենտում հիմա մարդիկ կան, որ չեն համապատասխանում պառլամենտական պարամետրերին: Հանրությունը պետք է զգոն լինի եւ ձայն տա այն մարդկանց եւ այն քաղաքական գործիչներին, որոնց ապագան կապվում է այս երկրի հետ»:
Հարցին՝ ՀՀԿ-ի ցուցակը գլխավորելու է Սերժ Սարգսյա՞նը, Վահրամ Բաղդասարյանը պատասխանեց. «Բավականին համբերել եք, մի երկու օր էլ համբերեք, ինչո՞ւ եք շտապում: Շատ եք շտապում»:
Հարցին՝ ահազանգեր կան ՀՀԿ-ականների ընտրակաշառքների մասին՝ պարոն Բաղդասարյանը պատասխանեց. «Բոլորիդ խնդրում եմ, եթե կլինեն նմանատիպ առաջարկություններ, թող վերցնեն եւ հայտնեն լրատվությանը: Ես կատեգորիկ դեմ եմ նման երեւույթներին: Եթե կան նման երեւույթներ, որը չեմ բացառում, որ կլինեն այդպիսի փորձեր, մենք բազմիցս խոսել ենք արջի ծառայությունների մասին, բարձրաձայնեք եւ դուք դրա արձագանքը կտեսնեք»:
Կարդացեք նաև
Հռիփսիմե ՋԵԲԵՋՅԱՆ
