«ԱԺ ղեկավարությունը խուսափում է որեւէ լուրջ հարց բերել խորհրդարան, տեխնիկական հարցեր են ընդամենը՝ միջազգային պայմանագրեր: Միակ նպատակն է այս հնարքով զրկել ընդդիմադիր գործիչներին Ազգային ժողովի խոսափողը ընտրություններից առաջ օգտագործելուց»,- այսօր ԱԺ ճեպազրույցների ժամանակ ամփոփելով քառօրյա նիստերը՝ ասաց ՀԱԿ խմբակցության ղեկավար Լեւոն Զուրաբյանը:
Նրա խոսքերով՝ «Հասկանալի է, դա իշխանությունների հնարքն է, ոչինչ, մենք մեր ձեւը կգտնենք քարոզարշավի համար: Ի վերջո ինտերնետի դարում ենք ապրում, ոնց էլ լինի, մեր ասելիքը կհասցնենք»:
Անդրադառնալով ընտրություններին՝ պարոն Զուրաբյանն ասաց, որ արդեն սկսել են անձնագրային տվյալների լայնածավալ հավաքագրումներ. «Ակնհայտ է, թե ինչի համար է դա արվում: Արվում է, որ ընտրողների վրա ազդեցություն գործածվի՝ կաշառքի ձեւով, ադմինիստրատիվ ճնշումների ձեւով: Բայց, միեւնույն է, այն նվաճումները, որ մենք ունեք, ի դեմս ստորագրված ցուցակների հրապարակմանը եւ տեսախցիկների տեղադրմանը տեղամասերում, ստեղծել ենք մի պատկեր, որ ուրիշի փոխարեն քվեարկություն չի լինելու»:
Նա ասաց, որ առաջներում էլ ընտրողների վրա ապօրինի ազդեցությունների գործընթաց էր լինում, բայց եթե չէր ստացվում ձայներ ապահովել, այն կես մլն ստորագրությունների կեղծումն էր լինում մատյաններում: Իսկ հիմա դա բացառված է, եւ ստեղծվում է հնարավորություն ընտրություններում հաղթելու. «Այսօրվանից Հայաստանում ստեղծվում է մեծ արշավ, մեծ պատերազմ, մի կողմից՝ փողի, մյուս կողմից՝ քաղաքական մտքի եւ արդարության միջեւ: Փողը եւ արդարությունը պատերազմելու են: Սա իրականում լինելու է ընտրություն՝ Մամոնայի եւ Աստծո միջեւ»:
Կարդացեք նաև
Լեւոն Զուրաբյանն ասաց, որ քաղաքական գործիչներն էլ չեն կարող արդարանալ, թե ամեն ինչ որոշված է, մարդիկ պետք է որոշեն իրենց հոգին ում տալ՝ Աստծո՞ւն, թե՞ ծախեն Մամոնային՝ հարստության աստծուն:
Հարցին՝ այսօր Գագիկ Ծառուկյանը ԲՀԿ նախագահի պաշտոնն է զբաղեցնում, նրա վերադարձում կա՞ Սերժ Սարգսյանի ազդեցությունը, Լեւոն Զուրաբյանը պատասխանեց. «Ես չեմ ցանկանում շահարկել, ենթադրություն անել: Մեր ժողովուրդը շատ լավ զգացողություն ունի, եւ այդ հարցի պատասխանը կարող է տալ միայն ինքը»:
Հռիփսիմե ՋԵԲԵՋՅԱՆ
