«Ամենակարեւորը՝ ապահովել, որ ընտրություններն արդար լինեն, եւ ամեն ձայն լսելի լինի: Եթե քվեարկության օրն ինչ-որ հարց է ծագում, անմիջապես պետք է դրան արձագանքել, եւ դա պարտավոր են անել բոլորը՝ հանձնաժողովները, քաղհասարակությունը: Ամեն հարց պետք է լուծվի տեղում՝ ժամանակի իրական ռեժիմով»,-այսօր կազմակերպված աշխատաժողովի ընթացքում լրագրողների հետ զրույցում անդրադառնալով առաջիկա խորհրդարանական ընտրություններում ընտրակեղծարարությունները բացառելու մեխանիզմներին, ասաց ընտրական վեճերի լուծման հարցերով միջազգային փորձագետ Ջոն Հարդին Յանգը:
«Քվեարկության օրը պետք է արագ արձագանքել: Հենց մի տեղ մի միջադեպ եղավ չարաշահման հետ կապված՝ դրան պետք է տեղում անդրադառնալ: Հենց մի բան տեսնում եք՝ ձայն հանեք»,-խորհուրդ տվեց Յանգը:
Ըստ նրա՝ ընտրություններից հետո ծագող բողոքների պատճառն այն է, որ դրանց տեղում չեն արձագանքել. «Որպես օրինակ՝ ենթադրենք, ձեր տանը հրդեհ է: Առաջինն ի՞նչ կանեք՝ ջուր կլցնե՞ք, թե երկու օր կսպասեք, որ տունն այրվի, ու գանգատվեք, թե քնելու տեղ չունեք…»:
Արձագանքելով նկատառմանը, թե ՀՀ նոր Ընտրական օրենսգիրքը բարդ է եւ կարող է դրանով իսկ չարաշահումների տեղիք տալ, փորձագետն ասաց. «Օրենսգիրքը գնալով հղկվում է: Պարզեցնելու տեղ ունի: Վստահ եմ՝ ժամանակի ընթացքում այդպես էլ կլինի: Անկախ նրանից՝ որքանո՞վ է ձեւապաշտական գրված օրենսգիրքը, ընտրությունների բուն գործընթացը շատ հասկանալի է: Օրենսգիրքը հնարավարություն տալիս է եւ պահանջում, որ հանձնաժողովի անդամները ընթացքում ծագող խնդիրները լուծեն»:
Կարդացեք նաև
Ջոն Հարդին Յանգի խոսքով՝ ձայների հաշվարկը պետք է արտացոլի ժողովրդի կամքը, եւ բոլորի պատասխանատվությունն է՝ երաշխավորել, որ արդար ընտրություններ անցկացվեն. «Ոչ ոք չի կարող իր «գլխից ցրել» ընտրական գործընթացի պահապանի դերը: Իսկ եթե գործընթացը ձախողվում է, նշանակում է՝ մենք չենք կատարել մեր այդ գործառույթը»:
«Կա՞ն չարաշահումները բացառելու մեխանիզմներ» հարցին փորձագետը պատասխանեց. «Չարաշահումն անընդունելի է ցանկացած տեղ, այդ թվում՝ ընտրություններում: Հուսանք՝ տեսախցիկները դրանց մի մասը կկրճատեն»:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
