Հաճախ ծնողներից կարելի է լսել, որ երեխաների ձեռքերի ափերը գրեթե միշտ քրտնած են, որ կապ չունի եղանակային պայմանների հետ: Պարզվում է, որ նման երեւույթի վրա չի կարելի ուղղակի աչք փակել, քանի որ այն կարող է մի շարք հիվանդությունների ահազանգ լինել: Մանկական էնդոկրինոլոգ Մարիամ Շահբազյանը «Առավոտի» հետ զրույցում նշեց, որ հնարավոր է նման երեւույթ նկատվի վահանագեղձի հիպերֆունկցիայի դեպքում, որը, ըստ նրա, ուղեկցվում է նաեւ հետեւյալ ախտանիշներով՝ դյուրագրգռվածություն, լացկոտություն, պարանոցի շրջանում խեղդման զգացում:
«Եթե տեւական բնույթ է կրում քրտնարտադրման գործընթացը եւ այլ ախտանիշներ չկան, ապա վահանաձեւ գեղձի հետ չի կապվում, բայց ծնողները պետք է դիմեն մասնագետի, քանի որ կարող է նեւրոզի եւ նյարդային համակարգի հետ կապվել նման երեւույթը»,-նշեց մասնագետը:
Նյարդաբան Անուշ Գասպարյանն էլ մեզ հետ զրույցում նշեց, որ քրտնարտադրության համար պատասխանատու է վեգետատիվ համակարգը, որը, մասնավորապես պատանեկան տարիքում՝ կապված սեռահասունության հետ, ունենում է ավելի ակտիվ դրսեւորումներ:
«Այդ ժամանակ հիմնականում քրտնարտադրություն լինում է ձեռքերի ափերում, ոտնաթաթերում, ճակատային հատվածում, կարող է կապված լինել նաեւ բուռն էմոցիաների, վիտամին D-ի պակասի, կամ ճիճուների առկայության հետ»,-ասաց նյարդաբանը:
Նրա խոսքերով՝ եթե այս խնդիրն անհանգստացնող եւ որոշ ժամանակ ձգվող բնույթ է կրում, պետք է դիմել բժշկի, որպեսզի ժխտվի այլ հիվանդության առկայությունը. «Սովորաբար, եթե այլ հիվանդություններ չեն լինում, ինչպես նաեւ նյութափոխանակության խնդիրներ, ապա տարիքի հետ անցնում է՝ կապված վեգետատիվ նյարդային համակարգի ավելի լավ զարգացման հետ»:
Մասնագետը խորհուրդ է տալիս՝ հետազոտությանը ուշադրություն դարձնել, եւ եթե պարազիտների առկայությունը ժխտվում է, վիտամին D-ի քանակությունը արյան մեջ ժխտվում է, կարելի է մի փոքր սպասել մինչեւ սեռահասունության ավարտը: Այն երեխաները, որոնք ավելի փոքր են եւ մինչ դեռահասունության տարիքը նման խնդիր ունեն, ապա նյարդաբանն ավելի հավանական է համարում ճիճուների առկայությունը, կամ վիտամին D-ի պակասը:
Ուստի անհրաժեշտ է դիմել համապատասխան մասնագետի՝ ճիշտ ախտորոշում ստանալու համար:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
09,02.2017
