Քրեակատարողական պետի տեղակալն այսուհետ ևս հնարավորություն կունենա տեսակցություն տրամադրելու կալանավորված անձի կամ դատապարտյալի հետ հանդիպելու ցանկություն ունեցող պաշտպանին կամ մերձավոր ազգականին: ՀՀ կառավարության այսօրվա նիստում այս մասին հայտարարեց արդարադատության նախարար Արփինե Հովհաննիսյանը՝ մանրամասնելով, որ գործող կարգավորմամբ կալանավորված անձանց և դատապարտյալներին տեսակցության եկած անձանց թույլտվություն տալու իրավասությունը պատկանում է քրեակատարողական հիմնարկի պետին և միայն նրա բացակայության դեպքում՝ տեղակալին: «Սակայն գործնականում հաճախ, աշխատանքային ծանրաբեռնվածությունից ելնելով, տեսակցության թույլտվություն տրամադրելու որոշումները քրեակատարողական հիմնարկի պետի կողմից հնարավոր չի լինում ընդունել սեղմ ժամկետներում: Արդյունքում տեսակցության եկած անձինք ստիպված են լինում տեսակցության թույլտվության համար սպասել որոշակի ժամանակ, ինչն առաջացնում է նրանց արդարացի դժգոհությունը»,- ասաց նախարարը՝ հավելելով, որ այս փոփոխության նպատակը կալանավորված անձին կամ դատապարտյալին տեսակցության եկած անձանց հերթերի առաջացումը կանխելն ու տեսակցությունների տրամադրման գործընթացի անհարկի ձգձգումները բացառելն է:
Արդյունքում կնվազի նաև քրեակատարողական հիմնարկի պետի ծանրաբեռնվածությունը:
ՀՀ ԱՆ տեղեկատվության և հասարակայնության հետ կապերի վարչություն
