ՀԱԿ խմբակցության քարտուղար Արամ Մանուկյանն այսօր ԱԺ-կառավարություն հարցուպատասխանի ժամանակ վարչապետ Կարեն Կարապետյանին նախ մի հորդոր ուղղեց. «Այն արգելապատնեշները, որ դրել եք ժուռնալիստների առաջ, խնդրում եմ հանեք, սիրուն չի: Պարո՛ն Սահակյան, սա ձեզ էլ է վերաբերվում: Այստեղ պրեզիդենտն էլ է գալիս, հազար մարդ է գալիս: Դուք որ գնաք կառավարություն, կարող եք այնպես անել, որ ձեզ ժուռնալիստներ չմոտենան: Ճիշտ չի: Հանեք այդ կարմիր գծերը, արգելապատնեշները, որով մարդիկ չեն կարողանում մոտենալ ձեզ»:
Կարեն Կարապետյանը պատասխանեց. «Կա նաեւ հակառակ կարծիքը, որ լրագրողների հետ մենք չափազանց շատ ենք հանդիպում: Որեւէ սահմանափակում լրագրողների հետ հանդիպման չենք դրել, չնայած լինում են դեպքեր, երբ մի առանձնապես հաճույք էլ չեմ ստանում դրանից, բայց ոչ միշտ»:
Կարեն Կարապետյանն արդեն կանխագուշակեց, թե իր խոսքերից հետո ինչպիսի մեկնաբանություններ արդեն կլինեն:
Արամ Մանուկյանն արձագանքեց՝ իսկապես միշտ չի, որ բոլոր լրագրողներին հաճույքով հնարավոր է պատասխանել, ինքն էլ է խնդիրներ ունենում, բայց կարգ կա՝ պետք է լրագրողը հարցը տա, կուզես՝ կպատասխանես, կուզես՝ չես պատասխանի: Բայց սա ԱԺ-ն է ու վարչապետը չպետք է այդպիսի պայման դնի, որ արգելափակոց դրվի լրագրողների առաջ:
Կարդացեք նաև
ԱԺ նախագահ Գալուստ Սահակյանն էլ իր կողմից պարզաբանեց, թե որեւէ մեկը նման պայման չի դրել. «Լրագրողներին դուք, մենք թողնում ենք միայն Ազգային ժողովի շենք, ոչ թե Ազգային ժողովի այգի, պա՞րզ ա»:
Արամ Մանուկյանն էլ հորդորեց՝ հարգելի ժուռնալիստներ, սրանից հետո այգի չմտնեք:
Պատգամավորը նաեւ վարչապետին հարցրեց այս տարի իր ստեղծած ռազմավարական նախաձեռնությունների կենտրոնից: Դուք ԾԻԳ-երը փակում էիք, որովհետեւ նույն գործառույթներն ունեին, ինչ նախարարությունները: Բայց այս կենտրոնի խնդիրները նորից նույնն են, ինչ տնտեսական զարգացման եւ ներդրումների նախարարության խնդիրները. «Մեկը մեկին կրկնվում են: Էկոնոմիկայի նախարարությունը գիտական հիմնարկ է եւ տնտեսության ռազմավարությունը մշակող կարեւորագույն օղակ: Ներդրումները, խթանումները, առաջարկները, այդ բոլորը, ինչ դուք դրել եք ռազմավարական կենտրոնի վրա, նախարարությունն անում է, այդ ֆունկցիան իրենց վրա է: Ես կարծում եմ այս երկու հիմնարկները իրար կրկնում են»:
Կարեն Կարապետյանը պատասխանեց, որ Ռազմավարական նախաձեռնությունների կենտրոնի անվանման մեջ կա, թե ինչ է անելու. «Դա պետություն-մասնավոր հատվածի համագործակցությունն է, հոգաբարձուների խորհրդի մեջ 6 անդամ մասնավոր սեկտորից է՝ հայտնի սփյուռքահայեր են 5 պետության: Այդ հարթակը քննարկում է բարեփոխումները ոչ միայն տնտեսության մեջ՝ հարկային-մաքսային հատված, դատական համակարգ: Դա տնտեսական զարգացման եւ ներդրումների նախարարության գործառույթների մե՞ջ է, պարոն Մանուկյան: Կարծում եմ, որ ոչ»:
Հռիփսիմե ՋԵԲԵՋՅԱՆ
