«Որոշում է կայացվել Հեղինակային իրավունքի և հարակից իրավունքների մասին նոր օրենք նախագծել, քանի որ փոփոխությունները հին օրենքում շատ էին, և փաթեթը մեծ էր ստացվում: Այնտեղ ընդգրկված կլինեն վերջին տասը տարիների միջազգային պայմանագրերի բոլոր նորմերը և կհամապատասխանեցվեն այդ պայմանագրերին, – այսօր «Արմենպրես» լրատվական գործակալությունում լրագրողների հետ հանդիպման ժամանակ ասաց Մտավոր սեփականության գործակալության Հեղինակային և հարակից իրավունքների բաժնի պետ Քրիստինե Համբարյանը: Նրա խոսքով տեխնիկայի զարգացման հետ միասին գիտության, գրականության, արվեստի ոլորտում առաջանում են նոր ստեղծագործություններ, և այս ամենի առաջացման հետ առաջ են գալիս նոր իրավահարաբերություններ, դրանք կարգավորելու համար էլ օրենքը մշտապես մնում է փորձագետների և իրավաբանների ուշադրության կենտրոնում: Սա էլ պատճառ է հանդիսացել, որ ՀՀ-ում ևս ուշադրություն դարձվի Հեղինակային իրավունքի և հարակից իրավունքների մասին օրենքին և նախագծվի նոր օրենք:
Մեծ փոփոխություններ են կատարվել գույքային իրավունքների կառավարող կազմակերպությունների հոդվածներում, որտեղ արդեն սահմանվել է հավատարմագրման գործընթաց, ինչպես նաև օրենքով նախատեսվել են հավատարմագիր տալու պայմանները: Այսպիսի կառույցները պետական լիազոր մարմնով կներկայացնեն անհրաժեշտ փաստաթղթերը, այնուհետև հավատարմագիր ստանալուց հետո կկարողանան գործել տվյալ ոլորտում: Նոր նախագծում նախատեսվել են նաև լայն սահմանափակումներ. սահմանվել է հավասարակշռություն հեղինակի իրավունքի և հասարակության շահերի միջև:
«Ես շատ կարևորում եմ այս փոփոխությունները, որովհետև այն լայն հնարավորություն կտա հատկապես ուսումնական հաստատությունների գրադարաններին առանց հեղինակի թույլտվության և վարձատրության վերարտադրել ստեղծագործությունները: Թանկարժեք դասագրքերը կվերարտադրվեն ուսանողների համար, որը նշանակում է, որ գրքերը հասանելի կլինեն նաև էլեկտրոնային տարբերակով»,- հավելեց Ք. Համբարյանը:
Հաջորդ փոփոխությունն արվել է թույլ տեսողություն ունեցող անձանց, կույրերի, ընթերցանության հետ խնդիրների ունեցողների համար: Այսուհետև հնարավորություն կտրվի ազատ փոփոխել ստեղծագործության ձևաչափը, օգտագործել այն առանց հեղինակի վարձատրության: Փոփոխությունները եղել են նաև կառուցվածային առումով, հեշտացվել է տերմինոլոգիան, ավելի մատչելի է դարձվել իրավատերերի համար:
Քրսիտինե Համբարյանն ավելացրեց նաև, որ մի շարք փոփոխություններ են ներկայացվել արդարադատության նախարարության կողմից քաղաքացիական օրենսգրքի 10-րդ բաժնի մասով, որը վերաբերում է մտավոր սեփականության իրավունքների կարգավորմանը. «Կարևորում եմ սրա դերը նրա համար, որ քաղաքացիական օրենսգրքում կրկնվում են հոդվածները, որոնք որ կարգավորվում են մտավոր սեփականության բնագավառի արդեն առանձին ընդունված օրենքներում: Կրկնությունից խուսափելու համար և առանձին օրենքով կարգավորւմ անելու համար քաղաքացիական օրենսգրքում կատարվել են համապատասխան փոփոխություններ, թողնվել է միայն մտավոր սեփականության վերաբերող ընդհանուր դրույթները»:
Հարցին, թե նախագիծը ե՞րբ կներկայացվի Ազգային ժողով, հյուրը պատասխանեց, որ այն կներկայացվի գարնան վերջում` քաղաքացիական օրենսգրքի ընդունումից հետո :
Ռոզա Հակոբյան
