Ֆիրդուսի թաղամասի բնակիչները, որոնց տներն արդեն 8-9 տարի է իրացվել են, սակայն այդպես էլ ո’չ փոխհատուցում, ո’չ էլ բնակարան են ստացել, կարծես թե խնդիրը կլուծվի: Այսօր պատասխանելով լրագրողների հարցերին ասաց Քաղաքաշինության պետական կոմիտեի նախագահ Նարեկ Սարգսյանը: Ըստ նրա, ֆիրդուսցիների խնդիրներով ոչ թե կոմիտեն այլ կառավարության ուրիշ օղակներն են զբաղվում եւ Նարեկ Սարգսյանի ունեցած տեղեկություններով, կառավարությունը, հետագա վճարման հիմունքներով բնակարաններ է ձեռք բերել, որպեսզի հատկացնի նախկինում բնակարանները կորցրած բնակիչներին:
Ինչ վերաբերում է Ֆիրդուսի տարածքում նոր իրացումներին ու թե ով է նոր ներդրողը, պարոն Սարգսյանը չցանկացավ անուններ հրապարակել: Կոմիտեի նախագահը նաեւ ասաց, որ Ֆիրդուսի շուկան նույնպես հանվելու է, իսկ թե այլ տեղ տեղափոխվելու է Aravot.am-ի հարցին, Նարեկ Սարգսյանն ասաց, որ չգիտի:
Մանրամասները` տեսանյութում
Կարդացեք նաև
Aravot.am-ը Նարեկ Սարգսյանից նաեւ հետաքրքրվեց, թե ե՞րբ է սահմանափակվելու Կենտրոնի կառուցապատումը: Մեր այն դիտարկմանը, թե քաղպաշտպանության դասեր ենք անցնում, սովորում երկրաշարժերի իրավիճակում ինչպես փախչել ու պաշտպանվել, բայց, փաստորեն փախչելու տեղ չունենք, Նարեկ Սարգսյանը պատասխանեց.
«Մենք ունենք մշակված Երեւանի կենտրոնի օրենքը, որտեղ մշակված են բոլոր սահմանափակումները: Օրենքը ներկայացրել ենք Ազգային ժողովի հանձնաժողով, օրենքը ստացել է դրական եզրակացություն եւ արդեն պետք է մտնի Ազգային ժողովի օրակարգ, որը անպայման կընդունվի 2017 թվականի ընթացքում: Առաջին անգամ օրենքով նախատեսվում են կառուցապատման խտության գործակիցներ, նման բան չի եղել: Դա նշանակում է, որ, եթե դու ուզում ես կառուցես շատ, այստեղ կա սահմանափակում, իսկ կենտրոնից դուրս չկա այդ սահմանափակումը»:
Նարեկ Սարգսյանին նաեւ հարցրինք, թե վարչապետի` ներդրումներ բերելու հանձնարարականից հետո, այս ամիսների ընթացքում քանի՞ ռեալ ներդրող ունենք: Ըստ կոմիտեի ղեկավարի` 3 տասնյակից ավելի, որոնց 47 տոկոսը` օտարերկրյա ներդրողներ են, մնացածը` տեղացի:
«Վարչապետի հանձնարարականի համաձայն մենք ներկայացրել ենք 2017 թվականի կառուցապատման ներդրումային փաթեթները: Քննարկումների արդյունքում ներկայացված ծրագրերից համարվել են ամբողջապես իրատեսական 105 միլիոն դոլարի քաղաքաշինական ծրագրերը»,-ասաց Նարեկ Սարգսյանը: Ըստ նրա, իրականում իրենք կառավարությանը ներկայացրել են 230 միլիոն դոլարի ծրագիր, քննարկումների արդյունքում հաստատվել է 105 միլիոն դոլարի ծրագիրը. «Այս ծրագրերի դեպքում կան ներդրողներ, կա գումար, բանկային երաշխիք, էսքիզային նախագիծ, պետք է ուղղակի աշխատանքային նախագիծ արվի»:
Պարոն Սարգսյանն ասաց, որ այդ 105 միլիոն դոլարի ծրագրերի մեջ չեն մտնում ընթացքի մեջ գտնվող ծրագրերը`Դվին հյուրանոցը, կրկեսի շենքը, ճանապարհաշինարարական ծրագրերը, փոքր ծավալի շինարարությունները:
Լուսինե ԲՈՒԴԱՂՅԱՆ
