«Սա Բելառուսի կողմից Ադրբեջանի հետ հակահայ մեղսակցության շարունակությունն է, որը մենք տեսել ենք նաեւ ՀԱՊԿ-ում: Սա մեկ քայլ անդին էր: Անհրաժեշտ է, որ այս հարցը բարվոք լուծում ստանա, քանի որ դա կարող է իսկապես սպառնալիք լինել բոլորիս նկատմամբ: Այլազգի լրագրողները, հասարակական գործիչները, եթե ցանկանան այցելել Ղարաբաղ, նրանք ի՞նչ երաշխիք կարող են ունենալ, որ նույնը նրանց հետ չի լինի»,- այսօր «Արմենպրես» ակումբում ասաց ՀՅԴ Հայ Դատի եւ քաղաքական հարցերի գրասենյակի պատասխանատու Կիրո Մանոյանը՝ անդրադառնալով ՌԴ քաղաքացի, բլոգեր Ալեքսանդր Լապշինին Ադրբեջանին արտահանձնելու Բելառուսի քայլին:
Պարոն Մանոյանի խոսքով, Բելառուսի նման քայլից հետո այլ բան չի մնում, քան Ադրբեջանի ու Բելառուսի միջեւ հավասարության նշան դնելը:
Հիշեցնենք, որ համացանցում իր տուրիստական նոթերով հայտնի Լապշինը տարիներ առաջ երկու անգամ այցելել էր Ղարաբաղ՝ այն ճանաչելով որպես անկախ պետություն, ամիսներ առաջ էլ քննադատել Իլհամ Ալիևին, ինչից հետո պաշտոնական Բաքուն բլոգերի դեմ մի քանի քրեական գործ էր հարուցել:
«Մեր հասարակությունը պետք է իր ձայնը բարձրացնի: Իսրայելում արդեն ցույցեր են, ու դրանք պիտի շարունակվեն: Այս հարցում արդեն պետք է հավասարության նշան դնել Ադրբեջանի եւ Բելառուսի միջեւ, նրանք նույն բանն են անում,-ասաց պարոն Մանոյանը,- Ադրբեջանի «սեւ ցուցակում» հայտնված եւ ոչ մի անձի հետ այդպիսի դեպք չի եղել: Այս հարցում մինչեւ վերջ պետք է գնալ, պարզելու համար, թե ինչու հենց Լապշինի հանդեպ այսպիսի վերաբերմունք պիտի լիներ»:
Կարդացեք նաև
ԱրփինեՍԻՄՈՆՅԱՆ
