Կառավարությունը Երեւանի քաղաքապետին առաջարկել է համայնքի սեփականությունը հանդիսացող Ազատության պողոտայի 1/16 հասցեում գտնվող 369,75 մ2 մակերեսով հողամասը նվիրել Հայաստանի Հանրապետությանը, որն էլ կհատկացվի Արաբական Միացյալ Էմիրությունների (ԱՄԷ) դեսպանությանը` դեսպանի կեցավայրի տեղակայման համար: Այս մասին տեղեկանում ենք կառավարության հինգշաբթի օրվա նիստի օրակարգից:
Բանն այն է, որ ԱՄԷ դեսպանությունը ՀՀ կառավարության որոշման համաձայն գնել է Երեւան քաղաքի Ազատության 1/16 հասցեում գտնվող 0, 184066 հա մակերեսով հողամասը՝ դեսպանի կեցավայրի համար: Հողամասը գտնվել է պարսպապատված վիճակում: Հողամասը ձեռք բերելուց հետո դեսպանատան շենքը նախագծելու համար կատարվել են գեոդեզիա եւ սահմանների ճշգրտում, ինչի արդյունքում պարզվել է, որ դեսպանատան կողմից ձեռք բերված տան պարիսպների ներսում տան առջեւի եւ աջ հատվածում կա մոտ 587,62 մ2 տարածք, որը գրանցված չէ սեփականության վկայականում եւ չի համապատասխանում տան հատակագծին, չնայած, որ գտնվում է կառուցապատված պարսպի ներսում: Դրա փոխարեն տան ձախ կողմում կա տարածք, որը սեփականության վկայականով պատկանում է դեսպանությանը, սակայն պարսպից դուրս է եւ այնտեղ կառուցված է ավտոճանապարհ:
Որոշման նախագծից, որը կառավարության նիստում կներկայացնի Արտաքին գործերի նախարարության ներկայացուցիչը, տեղեկանում ենք, որ էմիրությունների դեսպանությունը դիմել է Երեւանի քաղաքապետարան վերոնշյալ հողատարածքները փոխանակելու հարցով, ինչի արդյունքում հողամասի ընդհանուր 587,62 մ2 տարածքից 217,87 մ2 տարածքն արդեն իսկ փոխանակվել է, իսկ մնացած 369,75 մ2 տարածքը հանդիսանում է հուշարձանի պահպանության գոտի, որն էլ կտրամադրվի անհատույց օգտագործման իրավունքով:
Ելնելով դրանից՝ անհրաժեշտ է Երեւանի քաղաքային համայնքի սեփականությունը հանդիսացող 369,75 մ2 հողամասը նախ նվիրել Հայաստանի Հանրապետությանը, ապա անհատույց օգտագործման իրավունքով փոխանցել Արաբական Միացյալ Էմիրություններին:
Կարդացեք նաև
Լուսինե ԲՈՒԴԱՂՅԱՆ
