Վարչապետ Կարեն Կարապետյանը որոշել է պետական եկամուտների կոմիտեի հաշվեկշռում գտնվող 8 հազար 48 քառակուսի մետր մակերեսով եւ 434 617 887 դրամ արժողությամբ Երեւանի Պարույր Սեւակի փողոցի թիվ 5/1 հասցեում գտնվող շենքը ՊԵԿ-ից հետ վերցնել: Ինչպես տեղեկանում ենք կառավարության հինգշաբթի օրվա նիստի օրակարգից, ՊԵԿ-ին պատկանող շենքը վարչապետը որոշել է ամրակցել պետական գույքի կառավարման վարչությանը` հավանաբար վաճառելու նպատակով: Հիշեցնենք, որ կառավարության մի քանի նիստերում վարչապետը գերատեսչություններին հանձնարարականներ էր տվել «ունեցվածքը» գույքագրել ու ներկայացնել:
Նշյալ գույքը ՊԵԿ-ին տրամադրվել է 2009 թվականին կոմիտեի առանձնացված ստորաբաժանումների աշխատանքային պայմանները բարելավելու նպատակով: Սակայն որոշման նախագծից տեղեկանում ենք, որ այս ընթացքում հարկային վարչարարության բարեփոխումների շրջանակներում Կոմիտեում տեղի է ունեցել օպտիմալացում, եւ այդ շենքի հետագա օգտագործման անհրաժեշտությունը վերացել է:
Լուսինե ԲՈՒԴԱՂՅԱՆ
