Բելառուսի նախագահ Ալեքսանդր Լուկաշենկոն կոչ է արել Ռուսաստանին «սոսնձել» հարաբերությունները, ոչ թե այնպիսի որոշումներ կայացնել, որոնք ավելի կսրեն դրանք:
«Ինչու՞ մենք միասնական տնտեսական տարածություն ստեղծեցինք ոչ միայն մեր Միութենական պետությունում, այլև ԵվրԱզԷՍ-ում: Անցյալ տարի ԵվրԱզԷՍ-ում մենք ունեցանք 40 տոկոս կորուստ, այս տարի՝ 20: Ընդամենը՝ 60 տոկոս 2 տարում: Ահա և ինտեգրացիա… Բայց այս մասին պետք է խոսել, պետք է գտնել այդ նեղ տեղերը, ինչ-որ կերպ սոսնձել հարաբերությունները»,- ըստ «Ռիա»-ի` ասել է Լուկաշենկոն Կոստրոմայի նահանգապետ Սերգեյ Սինտիկովի հետ հանդիպմանը:
Այնուամենայնիվ, նրա խոսքով, ռուսական կողմը ձեռնարկում է այնպիսի քայլեր, որոնք կարող են միայն բարդացնել երկկողմ հարաբերությունները:
«Միավորելու, սոսնձելու, բացասականը հեռացնելու փոխարեն Սան Սանիչը (Սուրիկով, Ռուսաստանի դեսպանը Մինսկում-խմբ.) այսօրվանից արգելք է դնում Ռուսաստանին տավարի մսի մատակարարման վրա»,- ասել է Լուկաշենկոն:
Կարդացեք նաև
Նա նաև նշել է, որ երկու երկրների հարաբերությունների հիմքում ընկած է տնտեսությունը, և իր արտադրանքն արտահանելով Ռուսաստան՝ Բելառուսը գումար է վաստակում՝ վճարելու ռուսական էներգակիրների համար:
Պատրաստեց Վիկտորյա ԱՆԴՐԵԱՍՅԱՆԸ
