ՀՀ ԱԺ նախագահ Գալուստ Սահակյանը փետրվարի 7-ին ընդունել է աշխատանքային այցով Հայաստանում գտնվող Շվեդիայի Թագավորության Ռիկսդագենի արտաքին հարաբերությունների հանձնաժողովի անդամներին:
Ողջունելով հյուրերին՝ Գալուստ Սահակյանը կարեւորել է Շվեդիայի հետ բազմակողմ եւ փոխշահավետ համագործակցության ընդլայնումը, ինչպես նաեւ համապարփակ միջխորհրդարանական կապերի ակտիվացումը: Խորհրդարանի ղեկավարն գոհունակությամբ արձանագրել է, որ երկկողմ հարաբերությունները նոր թափ են ստանում, վերջին շրջանում ակտիվացել են նաեւ պատգամավորական բարեկամական խմբերի միջեւ շփումները: Ըստ ԱԺ նախագահի՝ փոխգործակցությունն էլ ավելի խորացնելու ուղղությամբ դեռեւս անելիքներ կան: Այս համատեքստում Գալուստ Սահակյանն անդրադարձել է միջխորհրդարանական հարթակներում երկկողմ համագործակցությանը: «Մեզ համար չափազանց կարեւոր է սերտ փոխգործակցությունը շվեդ պատվիրակների հետ Եվրոպայի խորհրդի, ԵԱՀԿ-ի եւ ՆԱՏՕ-ի խորհրդարանական վեհաժողովներում»,- ասել է ԱԺ նախագահը: Խորհրդարանի ղեկավարը բարձր է գնահատել Շվեդիայի աջակցությունը ժողովրդավարական գործընթացներում եւ վերահաստատել Հայաստանի՝ կառուցողական երկխոսությունը շարունակելու եւ խորացնելու պատրաստակամությունը: Գալուստ Սահակյանն ընդգծել է Շվեդիայի դերն Արեւելյան գործընկերության ձեւաչափի ստեղծման եւ կայացման գործում:
Խոսելով Լեռնային Ղարաբաղի հակամարտության խնդրի մասին՝ ԱԺ նախագահը փաստել է, որ Հայաստանը հակամարտության կարգավորումը տեսնում է բացառապես խաղաղ եղանակով եւ հավատարիմ է մնում իր որդեգրած սկզբունքին: «Հայկական կողմը կարեւորում է փոխվստահության մթնոլորտի ձեւավորմանն ուղղված միջոցառումների իրականացման անհրաժեշտությունը: Ցավոք, Ադրբեջանը շարունակաբար ոչ միայն մերժում է միջազգային հանրության նախաձեռնությունները, այլեւ հակառակը՝ իր ռազմատենչ հայտարարություններով ու գործողություններով խոչընդոտում է ցանկացած նախաձեռնություն»,- նշել է խորհրդարանի ղեկավարը:
Գալուստ Սահակյանը, բարձր գնահատելով Շվեդիայի խորհրդարանի կողմից Հայոց ցեղասպանության դատապարտումը, նշել է, որ այն եւս մեկ քայլ է ցեղասպանության համընդհանուր ճանաչման եւ աշխարհում նման ոճրագործությունների կանխման համար:
Կարդացեք նաև
Շվեդիայի Թագավորության խորհրդարանի արտաքին հարաբերությունների հանձնաժողովի նախագահ Քեննեթ Ֆորշլունդը, շնորհակալություն հայտնելով ընդունելության եւ ջերմ խոսքերի համար, նշել է, որ երկկողմ հարաբերությունները գտնվում են բարձր մակարդակի վրա: Քեննեթ Ֆորշլունդը կարեւորել է շփումների ընդլայնումը միջազգային հարթակներում, ինչպես նաեւ Արեւելյան գործընկերության շրջանակում:
Հյուրերի խնդրանքով՝ ԱԺ նախագահ Գալուստ Սահակյանը մանրամասն ներկայացրել է ՀՀ-ում իրականացված սահմանադրական բարեփոխումների նպատակը եւ մանրամասնել գործընթացի փուլերը:
ՀՀ ԱԺ հասարակայնության եւ տեղեկատվության միջոցների հետ կապերի վարչություն
