ԱԺ-ում «Բնակարանային հիփոթեքային կրեդիտավորման մասին» օրենքի քննարկման ժամանակ ՀՀԿ պատգմավոր Վահրամ Մկրտչյանը Կենտրոնական բանկի փոխնախագահ Ներսես Երիցյանին առաջարկեց վարկ վերցնելու դեպքում երաշխավորի ինստիտուտը փոխել, քանի որ հաճախ երաշխավոր են մարդիկ կանգնում ու դրա համար իրենք չեն կարողանում վարկ ստանալ:
Ներսես Երիցյանը պատասխանեց, որ 5-6 տարի առաջ դեպքեր էին լինում, որ երաշխավորն, առանց տեղեկացված լինելու, երաշիք էր տալիս, հատկապես՝ սպառողական վարկերի մասով եւ վարկային պատմությունը սեւացնում էր, չէր կարողանում վարկ վերցնել սեփական կարիքների համար: Հիմա պահանջում են, որ երաշխավորը անպայման պատշաճ իրազեկված լինի, եթե չի իրազեկվել բանկի կողմից, երաշխավորի նկատմամբ վարկային պատմության նշում չի արվելու:
Նախագծով ասվում է, որ վարկի 30 տոկոսի կանխավճար է պահանջվում:
Կարդացեք նաև
ՀՀԿ պատգամավորն առաջարկեց, որ կանխավճարը զրոյացվի, քանի որ երիտասարդ ընտանքիները դժվար կարողանան վարկի 30% կանխավճարը տալ: Ներսես Երիցյանն էլ պատասխանեց, որ 30%-ի իմաստն այն է, թե դու ինքդ ինչքան ես ռիսկ կրում այդ տասը տարիների, որովհետև տան գինը երեք տարի հետո կարող է փոխվել, խնայողության ունակությունն է հիմքը:
Նա այլ երկրների օրինակ բերեց, թե այլ երկրներում դա խնայողություն է, որ հեշտ փակես վարկը. «Իսկ մեզ մոտ ընկալումն այն է, որ մեկը մի տեղից պիտի փող գտնի, բերի տա կանխավճար, որ բանկը վարկ տա»: Ըստ Երիցյանի` պետք է մարդկանց կրթել, որ դա ընդունեն խնայողության հիմք, ոչ թե մի ուրիշ տեղից պարտք վերցնեն, որ կանխավճար տան:
Հռիփսիմե ՋԵԲԵՋՅԱՆ
