Փետրվարի 10-ին կայանալիք «Բարգավաճ Հայաստան» կուսակցության համագումարում Նաիրա Զոհրաբյանը վայր կդնի կուսակցության նախագահի եւ քաղխորհրդի նախագահի լիազորությունները: Դրանք կստանձնի Գագիկ Ծառուկյանը: Aravot.am-ի հետ զրույցում այդ տեղեկությունը հաստատեց նաեւ Նաիրա Զոհրաբյանը. «Գագիկ Ծառուկյանը վերստին կստանձնի կուսակցության նախագահի եւ քաղխորհրդի նախագահի պաշտոնը, ինչին որ այսքան ժամանակ սպասում էին կուսակցականները եւ ես»:
Հիշեցնենք, Նաիրա Զոհրաբյանը ԲՀԿ նախագահի եւ քաղխորհրդի նախագահի լիազորությունները ստանձնեց 2015-ին`Գագիկ Ծառուկյանի`քաղաքականությունից հեռանալուց հետո: Մեկ ամիս առաջ Գագիկ Ծառուկյանը հայտարարեց փակված քաղաքական էջը բացելու եւ առաջիկա խորհրդարանական ընտրություններին մասնակցելու մասին: Գագիկ Ծառուկյանի`ԲՀԿ նախագահի պաշտոնը ստանձնելուց հետո, արդյո՞ք, «Ծառուկյան» դաշինքում կոնֆիգուրացիան փոխվում է`հարցին, Նաիրա Զոհրաբյանը պատասխանեց, որ կոնֆիգուրացիա չի փոխվում, քանի որ ԲՀԿ-ն լինելու է դաշինքում`Գագիկ Ծառուկյան նախագահով:
Մնո՞ւմ է Նաիրա Զոհրաբյանը ԲՀԿ-ում`հարցին էլ այսպիսի պատասխան հնչեց. «Բնականաբար: Ես լինելու եմ միշտ Գագիկ Ծառուկյանի եւ ԲՀԿ-ի կողքին»:
Թե ո՞ր ուժերը կլինեն դաշինքում, առայժմ վերջնականապես ճշգրտված եւ համաձայնեցված չէ: Ուստի, Նաիրա Զոհրաբյանը անուններ չի հնչեցնում. «Երբ ամեն ինչ կլինի հստակ պայմանավորված եւ ստորագրված, մամուլին կտեղեկացնենք»:
Կարդացեք նաև
Նելլի ԳՐԻԳՈՐՅԱՆ
