Փետրվարի 6-ին Խնկո Ապոր անվան ազգային գրադարանում կայացավ Արփի Ոսկանյանի «Չի վաճառվում» պատմվածքների ժողովածուի շնորհանդեսը: «Անտարես» հրատարակչության հրատարակած ժողովածուում տեղ գտած պատմվածքները ընդգրկում են 20 տարվա ժամանակահատվածը` ներկայացնելով հեղինակի անցած ճանապարհը պատանեկությունից մինչեւ միջին տարիք, այդ ճանապարհին տեղի ունեցած աշխարհայացքային, գեղագիտական, ոճական փոփոխությունները: «Չի վաճառվում»-ը Արփի Ոսկանյանի չորրորդ գիրքն է:
Շնորհանդեսի ժամանակ գիրքը ոչ թե վաճառվեց, այլ խաղարկվեց: Միջոցառմանը ներկա ԱԺ պատգամավոր Նիկոլ Փաշինյանն իր խոսքում ասաց, որ մշակույթը, հատկապես գրականությունը ստեղծում է այն կաղապարը, որի շուրջ ձեւավորվում են հանրությունն ու պետությունը:
«Ճիշտն ասած, 2016 թ. ինքս ինձ համար հայտարարել էի ժամանակակից հայ գրականության ընթերցման տարի, եւ ցավոք, տարվա միայն մի մասը կարողացա հատկացնել դրան, բայց այն ինչ հասցրի կարդալ, հասկացա, որ ամենակարեւոր գործը, որ արվում է Հայաստանում, հենց այս տեքստերի ստեղծումն է, այդ տեքստերի մեջ կա բովանդակություն, լուծումներ, պարզապես պետք է ուշադիր ընթերցել դրանք: Ինչ վերաբերում է Արփի Ոսկանյանին, նշեմ, որ մեր համագործակցությունը` որպես ընթերցող եւ խմբագիր, շատ երկար տարիների պատմություն ունի: Ես ուրախ եմ արձանագրել, որ Արփի Ոսկանյանի գրածները «Հայկական ժամանակ» թերթում» տպագրելը մի արդյունքի հանգեցրել են, եւ թերթի հեղինակությունը դրանից աճել է»,- նշեց Նիկոլ Փաշինյանը:
Կարդացեք նաև
«Գրողուցավ» կայքի խմբագիր, գրող Համբարձում Համբարձումյանը կնոջ` Արփիի մասին խոսելիս կես կատակ-կես լուրջ ասաց. «Արփիի արձակը շատ հավանում եմ, ինքը միշտ հաղթում է բոլոր մրցույթներում, որոնց ես էլ եմ մասնակցում ու ես նախանձում եմ»:
«Անտարես» հրատարակչության խմբագիր Արքմենիկ Նիկողոսյանն ասաց, որ Արփիի մասին պատմական բաներ կարող է պատմել Հուսիկ Արան: Վերջինս հիշեց 1996-ին Արփիի ու իր հանդիպումը, երբ ինքը «Գարուն» ամսագրի գրականության բաժնի խմբագիրն էր: Ասում է` Արփիի բանաստեղծությունները չմերժեց, բայց դրանք ինչ-ինչ պատճառներով չտպագրվեցին: Այնուհետեւ 2000-ին հանդիպեցին «Առագաստ» սրճարանում, ապա լուսահոգի Վարուժան Այվազյանի մոտ: «Երբ Արփին տպագրվեց «Գարունում», միանգամից մեծ աղմուկ առաջացավ, տարբեր կարծիքներ, բայց մի բան հստակ էր` ասպարեզ է մուտք գործել տաղանդավոր անձնավորություն»,- շեշտում է Հուսիկ Արան: Ի դեպ, նա Արփի Ոսկանյանի ստեղծագործություններից մեկի հերոսն է դարձել:
«Պատմվածքները կուտակվել էին, վերջապես ազատվեցի իրենցից: Հիմա էլ իմը չեն»,-իր գրքի մասին ասաց հեղինակը: Արփին նաեւ հավելեց, թե հատուկ խոսք չի պատրաստել շնորհանդեսի առիթով, իրեն թվում էր, թե քննադատություններ կլսի իր մասին, բայց բոլորը միայն լավ բաներ ասացին:
Գոհար ՀԱԿՈԲՅԱՆ
