«Առաջին անգամ Սահմանադրությամբ ամրագրեցինք, որ ազգային փոքրամասնությունները ԸՕ-ով նախատեսված կարգով պետք է ներկայացված լինեն ԱԺ-ում: Որպեսզի հարց չառաջանար, թե արդյո՞ք նրանք կարող են Խորհրդարանում օգտագործել իրենց լեզուն, ամրագրվեց, որ պետք է տիրապետեն հայերենին»,-ՀՀ Սահմանադրական դատարանում այսօր լրագրողների հետ զրույցում ասաց ԱԺ աշխատակազմի ղեկավար, արդարադատության նախկին նախարար Հրայր Թովմասյանը:
Հիշեցնենք, որ Ընտրական օրենսգրքի համաձայն՝ Ազգային ժողովի պատգամավորի թեկնածու առաջադրվող քաղաքացու` հայերենին տիրապետելու հանգամանքի ստուգումն իրականացվում է թեստավորման միջոցով, որի արդյունքում տրվում է համապատասխան տեղեկանք: Ըստ կարգի` տեղեկանք ստանալու համար քաղաքացին պետք է դիմի ՀՀ կրթության և գիտության նախարարություն:
Հրայր Թովմասյանը տեղեկացրեց՝ եթե անձը որեւէ ուսումնական հաստատությունում ստացել է հայերենով կրթություն, դա հաստատվում է համապատասխան փաստաթղթով. «Դա կլինի դպրոց, տեխնիկում, համալսարան…այս ամենը նախատեսված է ազգային փոքրամասնությունների ներկայացուցիչների համար…Հասկանում եմ՝ կան պատգամավորներ, որոնք վատ են խոսում հայերեն, նրանց վրա դա չի տարածվելու, եւ լավ կամ վատ հայերեն խոսելը չի ստուգվելու»:
Մանրամասն՝ տեսանյութում։
Կարդացեք նաև
Լուիզա ՍՈՒՔԻԱՍՅԱՆ
