«Ասույթ կա ԱԺ-ում, որը ֆիլմից է գալիս՝ որտե՞ղ է Ցոլակ Դարբինյանը»,- ՀԱԿ խմբակցության քարտուղար Արամ Մանուկյանն այսպես կատակեց, երբ ԱԺ-ում Իշխան Զաքարյանի փոխարեն ՀՀ վերահսկիչ պալատի 2017-ի գործունեության տարեկան ծրագրի նախագիծը ներկայացրեց նրա տեղակալը՝ Արա Նռանյանը:
Հետո Արամ Մանուկյանը հարցրեց՝ կարո՞ղ են Սահմանադրությամբ հիմնավորել, թե ինչու է Իշխան Զաքարյանը ԱԺ-ում նախագիծը ներկայացնելու փոխարեն նախընտրական հարցերով զբաղված:
Արա Նռանյանը պատասխանեց. «Պարոն Զաքարյանը գտնվում է արձակուրդում եւ հիմա զբաղված է նախընտրական հարցերով»:
Արամ Մանուկյանի խոսքերով՝ ամեն անգամ մի պատճառաբանությամբ Իշխան Զաքարյանը չի գալիս ԱԺ ու չի մոտենում ամբիոնին. «Ախր չի տեղավորվում ոչ տրամաբանության, ոչ օրենքի մեջ: Ամեն անգամ մի բան պիտի ասեք, մի դեպքում՝ տատիկս էր հիվանդ, մյուս դեպքում՝ ավտոբուսից ուշացա, հետո՞: Չէ՞ որ սա ԱԺ է, ներկայացնում եք ծրագիրը, հաշվետվությունները՝ առանց առաջին դեմքի: Պատասխանը, թե որտեղ է Ցոլակ Դարբինյանը, բոլորն էլ գիտեն»:
Կարդացեք նաև
Հերմինե Նաղդալյանն էլ միջամտեց՝ ասելով, որ անցյալ տարի Իշխան Զաքարյանը ԱԺ եկել է, եւ Նռանյանն էլ օրենքով սահմանված կարգով է փոխարինում նրան:
Հռիփսիմե ՋԵԲԵՋՅԱՆ
