Այսօր արդարադատության նախարար Արփինե Հովհաննիսյանն ԱԺ-ում ներկայացրեց «Քրեական օրենսգրքում» փոփոխությունների նախագիծը, որով դատապարտյալների պայմանական վաղաժամկետ ազատման հարցին լուծում է առաջարկվում: Հիշեցնենք, որ այն մի քանի օր առաջ ներկայացվել էր ԱԺ պետաիրավական հարցերի հանձնաժողովում եւ դրական եզրակացություն ստացել:
Արփինե Հովհաննիսյանն ասաց, որ նախագծով դատապարտյալի համար կանխատեսելի կդառնա պայմանական վաղաժամկետ ազատման գործընթացը: Նախարարն ասաց, որ 2016-ին քրեակատարողականների վարչությունը 4500-ից ավելի պայմանական վաղաժամկետ ազատման դիմում է ստացել եւ միայն 630 դիմումի է տրվել դրական եղզրակացություն՝ ներկայացնելու անկախ հանձնաժողովին: Դրանցից բավարարվել է ընդամենը 120 դիմում: Մնացածն ուղարկվել է դատարան եւ միայն 3 տոկոսի դեպքում է բավարարվել դատարանում: Արփինե Հովհաննիսյանը, այս թվերը ներկայացնելով, հաստատեց, որ պայմանական վաղաժամկետ ազատման ինստիտուտը չի գործում ՀՀ-ում, արդյունավետ չէ: Նախարարը չի ակնկալում, որ նախագծի կիրառումից հետո 100 տոկոս արդյունավետություն կլինի, նման երկիր չկա աշխարհում. «Բայց այն, ինչ մենք ենք առաջարկում, ողջամտորեն կանխատեսելի կհամարվի դատապարտյալի համար, թե ինչ է անհրաժեշտ, որ ազատվի»: Հատուկ մասնագիտական հանձնաժողովն էլ կորոշի՝ որքան տոկոս է կազմում տվյալ դատապարտյալի՝ նորից հանցագործություն անելու հավանականությունը:
Արփինե Հովհաննիսյանն ասաց, որ հիմա օրական 40 դիմում է ստանում դատապարտյալներից եւ դիմումների 80 տոկոսը վերաբերում է պայմանական վաղաժամկետ ազատման ինստիտուտին:
ՀՀԿ խմբակցության պատգամավոր Խոսրով Հարությունյանը հարցրեց՝ ցմահ դատապարտյալների վրա տարածվո՞ւմ է վաղաժամկետ պայմանական ազատման ինստիտուտը՝ նախարարը պատասխանեց, որ եթե նրանց դատավճիռը շարունակում է ուժի մեջ մնալ, նրանք կարող են դիմել հանձնաժողովին՝ 3 տարի անց, ու նրանց համար որոշում կընդունվի այլ չափանիշներով՝ 8 ամիս փորձաշրջան սահմանելով եւ այլն:
Կարդացեք նաև
Հռիփսիմե ՋԵԲԵՋՅԱՆ
