Այսօր ԱԺ նիստում քվեարկության դրվեց ՀԱԿ խմբակցության պատգամավոր Նիկոլ Փաշինյանի նախագիծը՝ ԱԺ-ում ստեղծելու ժամանակավոր հանձնաժողով, որը կուսումնասիրի բարձրաստիճան պաշտոնյաների գույքային վիճակը, նրանց եկամուտների եւ ունեցվածքի ձեռքբերման օրինականությունը:
Նիկոլ Փաշինյանն ասաց, որ ԱԺ պետաիրավական հարցերի հանձնաժողովում դեմ են քվեարկել իր նախագծին եւ հակափաստարկներից մեկն այն է, որ հիմա ՀՀ-ում գործում է Բարձրաստիճան պաշտոնյաների եկամուտների եւ գույքի հայտարարգրման մեխանիզմ: «Բայց մենք գիտենք, որ դրանից դուրս են մնում բոլոր հարազատները, մերձավորները, բացի ամուսնուց եւ համատեղ ապրող երեխայից ու ծնողից, բավականին լայն շրջանակն դուրս է մնում դրանից»,-ասաց պատգամավորը:
Նախագիծը ներկայացնելիս Փաշինյանը դիմեց ՍԱՍ սուպերմարկետների սեփականատեր Արտակ Սարգսյանին՝ ասելով. «Պարո՛ն Արտակ Սարգսյան, ես հիմա բազմաթիվ նամակներ եմ ստանում, որոնց հեղինակներն ահազանգում են, որ դուք պարտադրում եք ՍԱՍ սուպերմարկետի աշխատողներին գրանցումից դուրս գալ եւ վերագրանցվել այն ընտրատարածքում, որտեղ դուք առաջադրված եք»: Նա ասաց, որ դիտմամբ է նշում պատգամավորի անունը, որ նա հնարավորություն ստանա պարզաբանել՝ ինչքանո՞վ են այդ տեղեկությունները համապատասխանում իրականությանը:
Փաշինյանը նաեւ կոչ արեց քաղաքացիներին, որ եթե նման բան իրենց պարտադրվի, անպայման ահազանգեն իրենց:
Կարդացեք նաև
Երբ Արտակ Սարգսյանը փորձեց պատասխանել՝ պարզվեց՝ նրա բարձրախոսը այնքան երկար չի աշխատել, որ չի էլ միանում արդեն: Ոչ մի կերպ չստացվեց միացնել նրա բարձրախոսը եւ նա խոսեց առանց դրա:
RA National Assembly session took place
Պատգամավորն ասաց, թե այդ տեղեկությունները, որոնք շրջանառվում են իր մասին, չեն համապատասխանում իրականությանը. «Ձեր տեղեկությունները ամբողջապես սուտ են: Գիտեք ինչի համար են տարածվում այդ տեղեկությունները, ընդհանրապես չեն համապատասխանում իրականությանը»:
Լրագրողների հետ զրույցում Արտակ Սարգսյանը չպատասխանեց իր առաջադրմանը վերաբերվող հարցերին:
Հռիփսիմե ՋԵԲԵՋՅԱՆ
