Գյումրու տեխնոլոգիական կենտրոնում բազմաթիվ գործարարների հետ այս քաղաքի ներդրումային զարգացման ծրագիրը քննարկելուց հետո, գյումրեցի լրագրողները վարչապետ Կարեն Կարապետյանին հարցրեցին, թե ինչքանո՞վ է ռեալ այս ծրագիրը, գյումրեցիները բազմաթիվ նման խոստումներ են լսել նախորդ վարչապետերից, որոնք անկատար են մնացել:
Ի պատասխան՝ վարչապետը սաստիկ բարկացավ. «Այսօրվա մեր ներկայացումը տեսե՞լ եք, դա էլ մեր խոստումն է, մենք ստեղծելու ենք ֆոնդ, որի ներդրումային փաթեթն այս պահին 10 միլիոն դոլար է, որը լինելու է տարբեր աղբյուրներից: Մենք առաջարկում ենք, որ գյումրեցի սեփականատերը նույնպես ինքը ընտրության հնարավորություն ունի, իր գույքով մասնակցի կամ իր գույքը վաճառի, եւ մենք այդ ծրագիրը իրագործելու ենք: Ի՞նչ ձեւ եք ուզում ասեմ, որ ինձ ավելի շատ հավատաք»:
Երբ լրագրողները հարցրեցին՝ ո՞րն է ծրագրի երաշխիքը, Կարեն Կարապետյանն ասաց. «Օրինակ` ես ի՞նչ պիտի ասեմ, որ դուք դա համարեք երաշխիք, լսեցիք ֆինանսական աղբյուրների մասին, պոտենցիալ ներդրողներին: Դուք լսե՞լ եք, չէ՞, ներկա եք եղել այստեղ, որ ապահովագրական ընկերությունները ներդնելու են, բիզնեսմենները ներդնելու են: Լսե՞լ եք դա, այսինքն ի՞նչ երաշխիք, ես ձեզ բարա՞թ տամ, որ ասում եք երաշխիք տվեք, ի՞նչ տեսքով եք պատկերացնում: Որ չներդրեցինք, ինչ ուզենաք, կգրեք»:
Լրագրողների հարցին՝ չե՞ք մտածում առաջնահերթ աշխատատեղ ստեղծելու մասին, որ մարդիկ չարտագաղթեն, վարչապետն ասաց. «Մտածել եմ, այդ իսկ պատճառով այստեղ եմ, որ աշխատատեղ ստեղծեմ, դուք էլ մի քիչ ձեր տրամադրությունը փոխեք, չի կարելի այդպես տրամադրությամբ երկիր փոխել, որ հարցը տալիս եք, պատասխանն էլ հուշեք՝ ինչ ասեմ»:
Կարդացեք նաև
Հարցին, թե այս ներդրմամբ հնարավո՞ր է սոցիալական վիճակը փոխել այս քաղաքի, վարչապետն ասաց. «Ոչ միայն, իհարկե, բայց սա տրամադրություն է փոխում, դա ներդրում է, միջավայր է: Մենք չենք ասում Գյումրու բոլոր հարցերը երկու փողոցով են լուծվում, բայց դուք գիտեք, որ միանգամից ամբողջն անհնար է չէ՞ լուծել: Մի քիչ էլ եկեք պրագմատիկ լինենք, մի քիչ էլ ձեր տրամադրությունները փոխեք, մի քիչ ժպտացեք, այ մարդ, ինչքան ջղայն եք սաղդ նայում»:
Դիտարկմանը, թե սոցիալապես ծանր այս քաղաքի մեջ հնարավոր չէ բարձր տրամադրություն ունենալ, Կարեն Կարապետյանը նետեց. «Դե ուրեմն անընդհատ դիլխոր եղեք, ըտենց կլինի՞»:
Նունե ԱՐԵՎՇԱՏՅԱՆ
