Շենգավիթ վարչական շրջանի ընդհանուր իրավասության դատարանում այսօր կայացավ նույն դատարանի նախկին դատավոր Իշխան Բարսեղյանի գործով նիստը: Հիշեցնենք, որ նա մեղադրվում է կաշառք վերցնելու մեջ: Այս նիստին մեղադրյալը ներկայացել էր: Նախորդ նիստը հետաձգվել էր՝ նրա՝ առողջական խնդիրների պատճառով ներկա չգտնվելու հիմքով:
Իշխան Բարսեղյանի պաշտպաններից Վարդուհի Էլբակյանը հանդես եկավ պաշտպանական կողմին քրեական գործին առնչվող որոշ նյութեր տրամադրելու միջնորդությամբ: Պաշտպաններից Արայիկ Ղազարյանը դատավորին ասաց, որ առանց պաշտպանական կողմին այդ նյութերը տրամադրելու՝ դատավարությունը մեկնարկելը սահմանադրական իրավունքի խախտում է:
Aravot.am-ի հետ զրույցում փաստաբան Վարդուհի Էլբակյանը մանրամասնեց, թե քրեական գործում առկա որ նյութերի եւ փաստական տվյալների մասին է խոսքը. «Մեզ չեն տրամադրվել լազերային սկավառակները, Իշխան Բարսեղյանին դատաբժշկական փորձաքննության ենթարկելու եզրակացությունն ամբողջությամբ, հեռախոսային վերծանումների լազերային սկավառակները»,-ասաց նա:
Կարդացեք նաև
Մեղադրող կողմը միջնորդության առնչությամբ կարծիք հայտնեց, որ դրանով պաշտպանական կողմը փորձում է իր սայթակումներն արդարացնել. «Պաշտպանական կողմը քրեական գործի նյութերին ծանոթանալու իրավունք ունեցել է, բայց համապատասխան միջնորդություն ժամանակին չի ներկայացնել»:
Ավելի ուշ դատարանը պաշտպանների միջնորդությունը բավարարեց: Այս գործով հաջորդ նիստը կկայանա փետրվարի 9-ին՝ 14:00-ին:
Լուիզա ՍՈՒՔԻԱՍՅԱՆ
