Հայաստանի պետական տնտեսագիտական համալսարանի մարզադահլիճում վոլեյբոլի եզրափակիչ հանդիպումով ավարտվեցին «Դասախոսական գավաթ» միջբուհական 4-րդ խաղերը, որն ավանդաբար կազմակերպում եւ անցկացնում է ՀՊՏՀ-ն, իսկ Հայաստանի երիտասարդական հիմնադրամը այս տարի միացել է նախաձեռնությանը որպես համակազմակերպիչ:
Մրցաշարին մասնակցել են 10 բուհերի դասախոսական թիմեր, որոնք լավագույններին որոշել են չորս մարզաձեւերում: Ըստ մարզաձեւերի մրցանակակիրներ դարձել են:
Շախմատ. Մանկավարժական համալսարան, Ագրարային համալսարան, Տնտեսագիտական համալսարան:
Հրաձգություն. Մանկավարժական համալսարան, Բժշկական համալսարան, Ամերիկյան համալսարան:
Կարդացեք նաև
Սեղանի թենիս. Պոլիտեխնիկ, Սլավոնական համալսարան, Բրյուսով:
Վոլեյբոլ. Ֆիզկուլտ ինստիտուտ, Ագրարային համալսարան, Մանկավարժական համալսարան:
ՀՊՏՀ ֆիզդաստիարակության ամբիոնի վարիչ Հովհաննես Գաբրիելյանը լրագրողներին ասաց, որ մրցաշարը սկսվել է միայն վոլեյբոլի առաջնությունով եւ վերջին երկու տարին է, ինչ մասնակցության ընդլայնմանը զուգընթաց, ծրագրում ավելացվել են այլ մարզաձեւեր: «Թիմերը հիմնականում համալրված են ֆիզդաստիարակության ամբիոնների դասախոսներով: Բայց կանոնադրության մեջ կետ կա, որ կարող են հանդես գալ նաեւ այլ ամբիոնների դասախոսներ: Սա նպաստում է դասախոսների առողջ ապրելակերպի, ֆիզիկական ակտիվության ապահովմանը: Մենք աշխատում ենք, որպեսզի անպայման ներգրավվեն նաեւ կին դասախոսները, որի նպատակով բոլոր մարզաձեւերում պարտադիր է «թույլ սեռի» ներկայությունը, իսկ վոլեյբոլում խաղադաշտում պետք է միշտ կին դասախոս լինի» – ասաց Հովհաննես Գաբրիելյանը:
Aravot.am-ի դիտարկմանը, թե ավելի ճիշտ չէ՞ր լինի, որպեսզի կանոնադրությունում նշված լիներ թիմերում ավելի շատ այլ ամբիոնների դասախոսների ներգրավված լինելու մասին, քան ֆիզդաստիարակության, Հ. Գաբրիելյանը պատասխանեց. «Ճիշտ միտք է: Ինձ թվում է, որ մյուս ամբիոնների դասախոսների համար կարելի է առանձին մրցույթ կազմակերպել. սկզբում՝ ներբուհական մրցումներ, այնուհետեւ՝ միջբուհական առաջնություններ: Եվ երբ բուհերը կունենան իրենց հավաքականները, մենք ուսանողական մարզական ֆեդերացիայի շրջանակներում կփորձենք նաեւ դա կազմակերպել»:
Աշոտ ՀԱԿՈԲՅԱՆ
