2016 թվականին Հայաստանում հայտնաբերվել է ուռուցքային տարբեր հիվանդություններով 8400 նոր դեպք: Սա մի փոքր ավելի է 2015թ. ցուցանիշից: Այս մասին «Հենարան» ակումբում ասաց առողջապահության նախարարության բժշկական օգնության քաղաքականության վարչության ղեկավար Ծաղիկ Վարդանյանը: Նրա ներկայացմամբ՝ ներկայումս ուռուցքային տարբեր հիվանդություն ունեցող 41 հազար հիվանդները գտնվում են դիսպանսեր հսկողության տակ:
Տիկին Վարդանյանի խոսքերով՝ ուռուցքային հիվանդությունների դեպքում խնդիր է ապրելիության ցուցանիշը: Վարդանյանի խոսքերով՝ քաղցկեղի ախտորոշումից հետո մարդու ապրած տարիների ցուցանիշը Հայաստանում զիջում է եվրոպական մեր տարածաշրջանի ընդհանուր ցուցանիշին. «Եթե քաղցկեղի նույն ախտորոշմամբ հիվանդը ապրում է, ասենք, 10 տարի, Հայաստանում՝ 6-7 տարի»:
Ըստ Վարդանյանի՝ քաղցկեղի հայտնաբերման 60%-ի դեպքում առաջին անգամ հայտնաբերվում է հիվանդության արդեն 3-4-րդ փուլերում: Սա խնդիր է, որովհետեւ կանխարգելման մասին խոսք լինել չի կարող:
Կարդացեք նաև
Քաղցկեղի բուժումը, ըստ Վարդանյանի՝ 3 փուլերով է՝ վիրաբուժական, քիմիաթերապիա եւ ճառագայթային:
Տիկին Վարդանյանն ասաց, որ սոցանապահով խմբերի քաղաքացիները քաղցկեղի վիրաբուժական միջամտությունը ստանում են պետպատվերով: Իսկ եթե արդեն ախտորոշվել է չարորակ ուռուցք, բոլոր դեպքերում վիրաբուժական միջամտությունն անվճար է:
Ինչ վերաբերում է քիմիաթերապիային, տիկին Վարդանյանն ասաց, որ այս առումով բողոքներ շատ են ստանում: Եթե քաղաքացին սոցիալապես անապահով խմբերում է, քիմիաթերապիայի համար նրան հատկացվում է 300 հազար դրամ՝ 5 սեանսի համար: Իսկ եթե հիվանդը ներառված չէ սոցխմբում՝ 150 հազար դրամ:
Մանրամասն՝ տեսանյութում
Տիկին Վարդանյանն ասաց, որ շատ կարեւոր է պալիատիվ՝ ամոքիչ բուժօգնության ներդրումը: Կառավարությունն արդեն հաստատել է այս բուժօգնության կարգը. «Հուսով ենք 2019 թվականին կունենանք արդեն, քանի որ ամոքիչ բուժօգնության կարիք ունեցող հիվանդների 70-80%-ը ուռուցքային հիվանդություններով են»:
Նելլի ԲԱԲԱՅԱՆ
