Քրեական օրենսգրքում փոփոխությունների նախագիծն այսօր ԱԺ պետաիրավական հարցերի հանձնաժողովի քննարկմանը ներկայացրեց արդարադատության նախարար Արփինե Հովհաննիսյանը:
Նա ասաց, որ դատապարտյալի վաղաժամկետ պայմանական ազատման ինստիտուտին է փոփոխությունը վերաբերում: Այսօր երեք հանձնաժողովներ են գործում եւ, ըստ նախարարի, այս ոլորտում պրակտիկան հուշում է, որ միջգերատեսչական անկախ այդ հանձնաժողովներն արդյունավետ չեն գործում. «Այլ որակումներ չեմ տա, բայց կարող եմ բարձրաձայնել, որ այդ հանձնաժողովները արդյունավետ չեն գործում»:
Նախարարն ասաց, որ լսել է դատապարտյալների հարազատների դժգոհությունները, իրավապաշտպանների դիտարկումները:
Հստակ չափանիշներ են սահմանվել, թե որ դեպքում դատապարտյալին պետք է տան պայմանական վաղաժամկետ ազատման հնարավորություն: Նախարարն ասաց, որ հաշվի են առնելու նրա աշխատանքը, վարքը: Անկախ հանձնաժողովի կազմում էլ պետք է ընդգրկված լինեն մասնագետներ, ոչ թե չինովնիկներ. «Առաջարկել ենք, որ այդ մասնագիտական հանձնաժողովի կազմում լինի սոցիալական աշխատող, հոգեբան, կրիմինոլոգ: Դատապարտյալի ներկայությունը պետք է լինի անկախ հանձնաժողովի նիստին, ոչ թե միայն գործն են տալու: Պետք է հանձնաժողովում տեսնեն դատապարտյալին, համոզվեն եւ տան իրենց համաձայնությունը: Դատապարտյալը, եթե բացասական եզրակացություն է ստացել, կարող է վիճարկել այն դատարանում»:
Կարդացեք նաև
ՀԱԿ խմբակցության պատգամավոր Գագիկ Ջհանգիրյանն ասաց, որ կողմ է գաղափարին, բայց ձեռնպահ քվեարկեց: Հանձնաժողովի մյուս անդամները կողմ քվեարկեցին եւ այն դրական եզրակացությամբ կներկայացվի ԱԺ մեծ օրակարգում:
Հռիփսիմե ՋԵԲԵՋՅԱՆ
