Aravot.am-ին տեղեկություններ էին հասել այն մասին, որ Արթիկի ՀՀԿ-ական քաղաքապետ Մխիթար Վարագյանը եւս մտադրություն ունի մասնակցել առաջիկա Ազգային ժողովի ընտրություններին: Սակայն վերջինս, ըստ տարածված լուրերի, կառաջադրվի ոչ թե իր կուսակցության վարկանիշային ցուցակով, այլ ՀՅԴ-ի:
Մխիթար Վարագյանի այս մտադրությունը շիրակցի պաշտոնյաները մեկնաբանում են հետեւյալ կերպ. բանն այն է, որ նա վիրավորված է իր կուսակցության տեղի կառույցից, նախ այն պատճառով, որ Արթիկի ՏԻՄ ընտրությունների ժամանակ ՀՀԿ-ն առաջադրեց ոչ թե իրեն, այլ նախկին ԲՀԿ-ական Մուշեղ Պետոյանին: Մխիթար Վարագյանին այդ ժամանակ սատարեց ՀՅԴ-ն՝ Շիրակի մարզպետ Հովսեփ Սիմոնյանի գլխավորությամբ: Մխիթար Վարագյանն էլ իր շնորհակալությունն որոշել է այս ձեւով հայտնել ՀՅԴ-ին՝ օգնելով այս կուսակցությանը մտնել խորհրդարան:
Սակայն սա դեռ ամենը չէ. մեր աղբյուրների փոխանցմամբ, օրերս Շիրակի մարզի ՀՀԿ կառույցի ղեկավար Սահակ Մինասյանն ու ԱԺ ՀՀԿ-ական պատգամավոր Արման Սահակյանն այցելել են «Գազպրոմ Արմենիա» ընկերության Արթիկի մասնաճյուղ, որի ղեկավարը Մխիթար Վարագյանի եղբայրն է՝ Արթիկի նախկին քաղաքապետ, ՀՀԿ-ական Խաչատուր Վարագյանը: Գյումրիից մեկնած ՀՀԿ-ական հյուրերը հորդորել են ԱԺ ընտրություններում պաշտպանել Մուշեղ Պետոյանի թեկնածությունը, որն էլ, բնականաբար, դուր չի եկել Վարագյան եղբայրներին: Առավել եւս, որ ՀՀԿ-ի՝ Շիրակի մարզի նախնական վարկանիշային ցուցակում որպես թեկնածու կա նաեւ կա Խաչատուր Վարագյանի անունը:
ՀՀԿ-ականներից վիրավորված լինելը ցուցադրելու նպատակով էլ Մխիթար Վարագյանը դաշնակցականների հետ քննարկել է ՀՅԴ-ով առաջադրվելու հարցը: Մենք փորձեցինք այս թեմայի շուրջ մեկնաբանություն ստանալ Շիրակի մարզի ՀՅԴ կառույցից, որտեղից հաստատեցին, որ նման խոսակցություն, իրոք, եղել է, սակայն դեռ որոշում չկա, վերջնական որոշումը Գերագույն մարմնինն է: Նաեւ տեղեկացրեցին, որ Մխիթար Վարագյանի թեկնածության հարցը տեղի կառույցում չի քննարկվել, նա հանդիպել է մայրաքաղաքի ՀՅԴ-ական ընկերների հետ: Շիրակի մարզի ՀՀԿ կառույցից եւս փոխանցեցին, որ տեղյակ են պարոն Վարագյանի այս մտադրության մասին:
Կարդացեք նաև
Սակայն Արթիկի քաղաքապետը կտրականապես հերքեց այս լուրերը՝ նշելով, որ նման բան գոյություն չունի, ինքը ՀՀԿ խորհրդի անդամ է: «Ես 3 ամիս է՝ ինչ ընտրություններից պրծել եմ, չե՞ք տեսնում ինչ գործի եմ լծված, ժողովրդի համար աշխատատեղ եմ բացում, քաղաքի հոգսերով եմ զբաղված: Նորից եմ կրկնում, ես Հանրապետական կուսակցության խորհրդի անդամ եմ, ես իրավունք ունեի նեղանալ ՀՀԿ-ից, բայց ոչ մի նեղվածություն չունեմ»,- ասաց Արթիկի քաղաքապետը:
Նունե ԱՐԵՎՇԱՏՅԱՆ
