«Զինծառայողների եւ նրանց ընտանիքների անդամների սոցիալական ապահովության մասին» ՀՀ օրենքի համաձայն, զինծառայողի ընտանիքի անդամի մահվան դեպքում նախատեսված է միանվագ դրամական օգնություն: Զինծառայողի ծնողները համարվում են ընտանիքի անդամ, եթե զինծառայողի հետ բնակվում են համատեղ: Ըստ այդմ, իրենց մշտական բնակության վայրից հեռու տեղակայված զորամասերում ծառայող զինծառայողները, որոնք հաշվառված են վարձակալած կամ պաշտպանության նախարարության տրամադրած ծառայողական բնակարաններում, չեն կարողանում օգտվել վերը նշված իրավունքից:
Կառավարությունն առաջարկում է փոփոխություններ կատարել «Զինծառայողների եւ նրանց ընտանիքների անդամների սոցիալական ապահովության մասին» ՀՀ օրենքում: Այդ դեպքում վերոնշյալ միանվագ օգնությունի կարող են օգտվել նաեւ այն զինծառայողները, ում ծնողները իրենց հետ չեն բնակվում:
Նախագիծն այսօր ԱԺ սոցիալական հարցերի մշտական հանձնաժողովի հավանությանն արժանացավ`մտնելով փետրվարի 6-ին մեկնարկելիք ԱԺ քառօրյա նիստերի օրակարգ:
Կարդացեք նաև
Հանձնաժողովում`ՀՀԿ-ական անդամների դրական քվեարկության արդյունքում դրական եզրակացություն ստացավ եւ առաջիկա քառօրյայի օրակարգ ընդգրկվեց կառավարության մեկ այլ նախաձեռնություն էլ, որը վերաբերվում է «Կուտակային կենսաթոշակների մասին» ՀՀ օրենքում փոփոխություններ եւ լրացումներ կատարելուն:
Այդ փոփոխություններով, ըստ ԿԲ նախագահի տեղակալ Ներսես Երիցյանի, պարզեցվում են որոշակի ընթացակարգեր: Քաղաքացիները հնարավորություն կունենա քաղվածքների մասին տեղեկատվություն ստանալ էլեկտրոնային փոստերով, նաեւ արտերկրից ՀՀ կենսաթոշակային հաշիվների տեղափոխման կարգ է առաջարկվում: Գործող օրենքը դա չէր նախատեսում: Առաջարկվող փոփոխություններով նախատեսվում է նաեւ բարձր աշխատավարձ ստացող անձանց`իրենց ցանկության դեպքում, կուտակել կենսաթոշակի 10-15 տոկոսը: Այդ պարագայում պետության մասնակցության տոկոսը չի ավելանում, մնում է նույնը:
«Ի՞նչն է պատճառը, որ կամավոր կուտակայինի որեւէ դիմում չունենք մինչ օրս: Եթե դիմում չունենք ինչո՞ւ ենք կամավորի սկզբունքը պահում, երբ կա պարտադիրը: Ի՞նչ է տալու սա մեզ»,- հանձնաժողովի ՀՀԿ-ական նախագահ Հակոբ Հակոբյանի հարցերին ի պատասխան Ներսես Երիցյանը բացատրեց` միջազգային ընդունված նորմեր կան`եկամտից 10-15 տոկոս պետք է խնայես, եթե ուզում ես, որ կենսաթոշակի անցնելուց հետո կենսամակարդակդ չնվազի: Եվ ասաց, որ կան բարձր աշխատավարձ ստացող խավեր, որոնք ասում են`թույլ տվեք մենք առանց պետության մասնակցության սկսենք: Ըստ Ներսես Երիցյանի, համակարգից հասկացող մարդիկ ասում են`լավ է: Արտասահմանցիները նույնիսկ զարմանում են, թե ինչո՞ւ Հայաստանում մարդիկ չեն համաձայնվում, եթե պետությունը մասնակցում է:
Նախագծին կողմ քվեարկեցին ՀՀԿ-ականներ Հակոբ Հակոբյանը, Արմեն Մխիթարյանը, Վրեժ Մարկոսյանը եւ Ռուբեն Հովսեփյանը:
Նելլի ԳՐԻԳՈՐՅԱՆ
