Առաջիկա Ազգային ժողովի ընտրություններին Արթուր Բաղդասարյանի գլխավորած «Հայկական վերածնունդ» կուսակցության վարկանիշային ցուցակով հին դեմքերից՝ փորձառու պատգամավոր Հովհաննես Մարգարյանից, Արթիկի նախկին ոստիկանապետ Տիգրան Պետրոսյանի գյուղապետ եղբորից՝ Հունան Պետրոսյանից բացի կմասնակցի նաեւ «Հայավտոկայան» ՓԲԸ Մարալիկի մասնաճյուղի 32-ամյա պետ Գալուստ Ուռուտյանը:
Նշենք, որ նա Լեւոն Տեր-Պետրոսյանի թիմակցի՝ Հարություն Ուռուտյանի որդին է: Ընթերցողները վերջինիս առավել շատ հիշում են 2008 թվականի նախագահական ընտրություններից, երբ ձերբակալում, բանտ էին գցում առաջին նախագահի համակիրներին. Հարություն Ուռուտյանը այս ընթացքի առաջին քաղբանտարկյալն էր:
Երիտասարդ թեկնածուն Aravot.am-ի հետ զրույցում ասաց, որ ինքը երբեք կուսակցական չի եղել. մեկ տարի է՝ անդամակցում է «Հայկական վերածնունդ» կուսակցությանը ու Մարալիկի տարածաշրջանի 16 գյուղերի «Հայկական վերածնունդ» կուսակցության համակարգող նախագահն է:
«Ուզում եմ Մարալիկի հոգսերը վերցնեմ ինձ վրա, քաղաքիս մի բանով կարողանամ օգտակար լինել: Խորհրդարանում վաղուց Մարալիկից ընտրված պատգամավորներ չկան, վերջին անգամ 90-ական թվականներին՝ Լևոն Տեր-Պետրոսյանի ժամանակ ենք ունեցել պատգամավոր: Գյումրիից կամ Արթիկից առաջադրվածներն էլ եկել, մարալիկցիներին համոզել են, ձայները տարել են ու ոչ մի բանով Մարալիկին պիտանի չեն եղել: Հիմա էլ պատրաստվում ենք դառնալ պատգամավոր, կարողանանք Մարալիկին մի փոքր լումայով օգտակար լինել»:
Կարդացեք նաև
Մեր դիտարկմանը, թե Մարալիկի ՀՀԿ-ական քաղաքապետ Արտակ Գևորգյանի հետ լարված հարաբերությունների պայմաններում ինչպե՞ս եք պատկերացնում ձեր քարոզարշավը. չե՞ն խոչընդոտի ձեզ քաղաքային իշխանությունները, Գալուստ Ուռուտյանն ասաց. «Այո, նախկինում որոշակի լարվածություն եղել է Մարալիկի քաղաքապետի հետ՝ կապված հորս ու նրա տարբեր քաղաքական հայացքների հետ, բայց երկուսս էլ ծնվել, մեծացել ենք Մարալիկում ու շատ լավ պատկերացնում ենք, որ համագործակցելով ավելի շուտ ոտքի կկանգնեցնեք գործազրկության, աղքատության մեջ թաղված մեր ծննդավայրը»:
Լուսանկարը՝ Գալուստ Ուռուտյանի ֆեսբուքյան էջից
Նունե ԱՐԵՎՇԱՏՅԱՆ
