Aravot.am-ը Մարդու իրավունքների պաշտպանի մամուլի քարտուղար Զոհրապ Եգանյանից հետաքրքրվեց՝ արդյոք ՄԻՊ-ն ուսումնասիրո՞ւմ է հունվարի 17-ին զորացրված Հայկ Գինովյանի բողոքը, որի զինգրքույկում սպիտակ ներկով ջնջվել էր գրառումն այն մասին, որ երիտասարդն ապրիլյան պատերազմի մասնակից է: Երիտասարդի հավաստմամբ, նույն զորամասում ծառայած նրա ընկերների զինգրքույկներում էլ է գրիչով ապրիլյան պատերազմին մասնակցությունն անվավեր ճանաչվել:
Զոհրապ Եգանյանն, առանց անուններ հայտնելու, ասաց, որ այս պահին իսկապես ունեն քաղաքացուց ստացված դիմում, եւ հարցն ուսումնասիրվում է, որից հետո համապատասխան գրություն կուղարկվի Պաշտպանության նախարարություն:
ՄԻՊ մամուլի խոսնակը նաեւ հավելեց, որ նախատեսված է այդ քաղաքացու ընդունելությունը, ամենայն հավանականությամբ՝ վաղը:
Կարդացեք նաև
Հավելենք, որ խնդիրը մեծ հնչեղություն է ստացել մամուլում: Պաշտպանության նախարարի մամուլի քարտուղար Արծրուն Հովհաննիսյանն էլ կատարվածի առնչությամբ ասել էր, թե դա մասնավոր դեպք է եւ պետք է ուսումնասիրվի:
Իմիջիայլոց, պատերազմական կենսագրությունը զինկոմիսարիատում «խմբագրված» տղաներից մեկն էլ «Ազատություն» ռ/կ-ի թղթակցի հետ զրույցում ասել էր, թե հավանաբար իրենց հետ այդպես վարվելու պատճառներից մեկն այն է, որ արտոնություններ չունենան եւ չօգտվեն ուսման վարձերի 50 % զեղչից:
Գոհար ՀԱԿՈԲՅԱՆ
Զինգրքույկի լուսանկարները` tert.am-ի
