«Միսս Տիեզերք» գեղեցկության մրցույթի հաղթող է դարձել ֆրանսուհի Իրիս Միտենարը: Այս մասին հայտնում է Lenta.ru-ն:
Գեղեցկուհիների եռյակում, Միտենարից բացի, հայտնվել են Հաիթիի ներկայացուցիչ 25-ամյա Ռաքել Պելիսիեն և 23-ամյա կոլումբիացի Անդրեա Տովարը:
«Միսս Ֆրանսիան» ծնունդով Լիլլից է, 23 տարեկան, պատրաստվում է դառնալ վիրաբույժ-ատամնաբույժ: Նա պատմել է, որ սիրում է էքստրեմալ սպորտաձևեր, այդ թվում պարաշյուտից ցատկ, բանջի-ջամփինգ և դելտապլաներիզմ:
Ֆրանսիայի ներկայացուցիչը «Միսս Տիեզերք» տիտղոսին արժանացել է միայն մեկ անգամ՝ 1953թ.:
Կարդացեք նաև
Անցյալ տարվա մրցույթի հաղթողը՝ Ֆիլիպինների ներկայացուցիչ Պիա Ալոնսո Վուրտցբախը հաղորդավար Սթիվ Հարվիին փոխանցել է ակնոց, որպեսզի նա կարողանա ուշադիր կարդալ հաղթողի անունը՝ նախքան բարձրաձայնելը:
Հիշեցնենք, անցյալ տարի Հարվին սխալվել էր՝ մրցույթի հաղթող հայտարարելով Կոլումբիայի ներկայացուցիչ Անրիանդա Գուտիերեսին, 2 րոպե անց ուղղել էր իր սխալը:
Մրցույթի եզրափակչում մասնակիցները բարձրացրել են քաղաքական բնույթի հարցերը: Մասնավորապես, հաղթող մասնակիցը բարձրացել է միգրացիոն ճգնաժամի հարցը, Կոլումբիայի և Քենիայի ներկայացուցիչները իրենց կարծիքն են հայտնել ԱՄՆ նախագահ Դոնալդ Թրամփի և նախընտրական արշավում նրա մրցակից Հիլարի Քլինթոնի մասին :
Այս տարի «Միսս Տիեզերք» մրցույթն ընթանում էր Ֆիլիպինների մայրաքաղաք Մանիլայում: Ամենագեղեցիկ աղջկա տիտղոսի համար պայքարում էին 85 երկրների ներկայացուցիչներ:
Պատրաստեց՝ Վիկտորյա ԱՆԴՐԵԱՍՅԱՆԸ
