Հունվարի 29-ին, հանդիսապետությամբ Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի, Հայոց բանակի 25-րդ տարեդարձի առիթով Մայր Աթոռ Սուրբ Էջմիածնում մատուցվեց Սուրբ և Անմահ Պատարագ: Պատարագիչն էր ՀՀ ԶՈՒ հոգևոր առաջնորդ Գերաշնորհ Տ. Վրթանես եպիսկոպոս Աբրահամյանը:
Արարողությանը ներկա էին Հայաստանի Հանրապետության Պաշտպանության նախարար Վիգեն Սարգսյանը, ՀՀ ԶՈՒ ԳՇ պետ, գեներալ-լեյտենանտ Մովսես Հակոբյանը, ՀՀ ԶՈՒ բարձրագույն սպայակազմը, Մայր Աթոռի միաբաններ, թեմակալ առաջնորդներ, ՀՀ ԶՈՒ Հոգևոր առաջնորդության սպասավորներ, զինվորներ և բազում ուխտավոր հայորդիներ:
Պատարագի արարողությունից առաջ Ամենայն Հայոց Կաթողիկոսն ընդունեց ՀՀ Պաշտպանության նախարարին և ՀՀ ԶՈՒ ԳՇ պետին` Հայոց բանակի 25-րդ հոբելյանի կապակցությամբ ի դեմս նրանց շնորհավորելով հրամանատարներին ու զինվորներին:
Այնուհետև եկեղեցական թափորով Վեհափառ Հայրապետը և նախարարն առաջնորդվեցին Մայր Տաճար: Թափորի առջևից գնդերեցները կրում էին Հայոց բանակի` պահապան հռչակված Աշոտ Երկաթի խաչի կրկնօրինակ մասունքակիր խաչը և ՀՀ ԶՈՒ Հոգևոր առաջնորդության դրոշը:
Կարդացեք նաև
Սուրբ Պատարագի ընթացքում հրապարակվեց Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի սրբատառ կոնդակը՝ նվիրված Հայոց բանակի 25-ամյա հոբելյանին:
Կոնդակը, որ «Էջ Միածինն ի Հօրէ» շարականի երգեցողության ներքո Մայր Աթոռի լուսարարապետ Գերաշնորհ Տ. Հովնան եպիսկոպոս Հակոբյանի կողմից բարձրացվեց Ավագ Ս. Խորան, ընթերցվեց Տ. Վրթանես եպիսկոպոս Աբրահամյանի կողմից:
ՈՂՈՐՄՈՒԹԵԱՄԲՆ ԱՍՏՈՒԾՈՅ ԵՒ ԿԱՄՕՔՆ ԱԶԳԻՍ
ԵՊԻՍԿՈՊՈՍԱՊԵՏ ԵՒ ԿԱԹՈՂԻԿՈՍ ԱՄԵՆԱՅՆ ՀԱՅՈՑ,
ԾԱՅՐԱԳՈՅՆ ՊԱՏՐԻԱՐՔ ՀԱՄԱԶԳԱԿԱՆ ՆԱԽԱՄԵԾԱՐ ԱԹՈՌՈՅ ԱՐԱՐԱՏԵԱՆ
ԱՌԱՔԵԼԱԿԱՆ ՄԱՅՐ ԵԿԵՂԵՑՒՈՅ ՍՐԲՈՅ ԿԱԹՈՒՂԻԿԷ ԷՋՄԻԱԾՆԻ
ՔՐԻՍՏՈՍԱՒԱՆԴ ՍԻՐՈՅ ՈՂՋՈՅՆ ԵՒ ՕՐՀՆՈՒԹԻՒՆ ՀԱՅՐԱՊԵՏԱԿԱՆ
ՄԵԾԻ ՏԱՆՆ ԿԻԼԻԿԻՈՅ ԿԱԹՈՂԻԿՈՍՈՒԹԵԱՆ, ՊԱՏՐԻԱՐՔՈՒԹԵԱՆՑ ՀԱՅՈՑ
ՍՐԲՈՅ ԵՐՈՒՍԱՂԻՄԱՅ ԵՒ ԿՈՍՏԱՆԴՆՈՒՊՈԼՍՈՅ,
ԱՐՔԵՊԻՍԿՈՊՈՍԱՑ, ԵՊԻՍԿՈՊՈՍԱՑ, ՎԱՐԴԱՊԵՏԱՑ, ՔԱՀԱՆԱՅԻՑ ԵՒ ՍԱՐԿԱՒԱԳԱՑ,
ԹԵՄԱԿԱՆ ԵՐԵՍՓՈԽԱՆԱԿԱՆ ԺՈՂՈՎՈՑ, ԹԵՄԱԿԱՆ ԵՒ ՀԱՄԱՅՆՔԱՅԻՆ ԽՈՐՀՐԴՈՑ ԵՒ ՊԱՇՏՕՆԷԻՑ ԵՒ ՍԻՐԵՑԵԱԼ ՀԱՄԱՅՆ ՀԱՒԱՏԱՑԵԱԼ ԺՈՂՈՎՐԴԵԱՆ ՀԱՅՈՑ
«Տէր զօրութիւն ժողովրդեան իւրոյ տացէ և
օրհնեսցէ զժողովուրդ իւր ի խաղաղութիւն»
(Սղմ. 28.11)։
Գոհություն և փառք ենք վերառաքում առ Բարերարն Աստված, որ խաղաղության մեջ ենք տոնում Հայոց բանակի 25-րդ տարեդարձը: Հայրապետական այսու Կոնդակով օրհնության և շնորհավորանքի Մեր խոսքն ենք ուղղում մեր հաղթական բանակի քաջասիրտ սպաներին ու զինվորներին և համայն մեր ժողովրդին:
Անկախ մեր պետականության փառապանծ զավակն է Հայոց բանակը, որ կազմավորվեց մեր հայրենիքի համար ծանր ու դժնդակ օրերին: Մեր ժողովուրդը դիմակայում էր հարձակումներին Հայաստանի սահմաններում և Արցախում պաշտպանում ազատ ապրելու իր իրավունքը: Պատերազմի, շրջափակման, տնտեսական փլուզումների, գաղթականության, ավերածությունների, կուտակված ահռելի դժուարությունների պայմաններում մեր ժողովուրդը չդադարեց հավատալ, որ, ինչպես սաղմոսերգուն է ասում, «Տերն իր ժողովրդին զորություն պիտի տա և իր ժողովրդին պիտի օրհնի խաղաղություն պարգևելով»: Խաղաղ ու ապահով ապրելու ձգտումով ազգիս զավակները ապավինած Աստծուն ելան պաշտպանելու մեր նվիրական հայրենիքը և մեր հայրերի ստեղծած ժառանգությունը: Հայրենասեր սրտերի բոցից մեր բանակը ծնունդ առավ ինչպես օր առ օր մեծացող Սասունցի Դավիթ, ամրապնդվեց ու զորացավ մարտերում` իր հաղթանակներով զորացնելով նաև խաղաղ կյանքի հույսն ու լավատեսությունը մեր ժողովրդի:
Այսօր հպարտությամբ ենք անդրադառնում Հայոց բանակի 25-ամյա պանծալի ուղուն, հաղթանակներին ու ձեռքբերումներին: Տիրոջ օգնականությամբ ամրացվել են մեր սահմանները, ազատագրված է Արցախը, որը հակառակ թշնամու ամենօրյա սադրանքների` շենանում է ու բարգավաճում: Մեր բանակը շարունակում է երաշխավորել մեր հայրենիքի ապահովությունը և առավել լուսավոր ապագան` փառքով պսակելով իր ծառայությունը հայրենիքին: Նախորդ տարի, ապրիլյան պատերազմի օրերին ականատես դարձանք քաջարի ոգուն և սխրանքներին մեր հերոս զավակների, երբ մեր բանակը խափանեց հակառակորդի դավադիր ծրագրերը և վերստին ապացուցեց, որ մշտապես պատրաստ է պաշտպանելու մեր հայրենիքը, արցախահայության ազատ ապրելու իրավունքը:
Աղոթքով ենք հիշում Մեր զավակներին, ովքեր նահատակության պսակն ընդունեցին` հանուն մեր ժողովրդի խաղաղ կյանքի ու լուսավոր ապագայի: Նրանց անմահ անունները միշտ պիտի ապրեն մեր ժողովրդի հոգում՝ մեր պատմության խնկելի հերոսների շարքին, ովքեր իրենց անկեղծ հայրենասիրությունն ու ազգասիրությունը վկայել են իրենց կյանքով ու գործերով:
Այս հիշարժան օրը հայրական Մեր ջերմ սերը, գնահատանքն ու օրհնությունն ենք բերում մեր փառապանծ բանակի զորականներին, որ մշտարթուն ծառայությամբ ապահովում են անդորրությունը մեր երկրի: Մեր գնահատանքն ու օրհնությունն ենք բերում բանակի կայացման գործում իրենց ավանդն ունեցող բոլոր երախտավորներին, այսօր բանակի զորացմանը աջակցողներին և բանակում ծառայող հոգևոր սպասավորներին, ովքեր իրենց արժանավոր նպաստն են բերում մեր զավակների հավատավոր, պայծառ ու արի նկարագրի կերտմանը:
Հայոց բանակի սիրելի փառապանծ զորավարներ ու զինվորներ, դուք քաջ գիտեք, որ բանակն ուժեղ է ոչ միայն զենք ու զինատեսակներով, այլ նաև` ոգով ու պատրաստուածությամբ: Ձեր սերը հայրենիքի հանդեպ, ծառայության մեջ ձեր նախանձախնդրությունը, միմյանց հանդեպ ազնիվ վերաբերմունքն ու հոգածությունը ձեր հոգին զորացնող հավատքն ու հույսը նույնպես ձեր զենքերն են: Մաղթում ենք, որ մեր բանակը միշտ լինի հայրենասիրության դարբնոց, աննկուն պաշտպանը մեր ժողովրդի արդար իրավունքների ու ամեն առաքինության օրինակ, և մեր կյանքում միշտ ամուր լինեն հույսն ու քաջալերությունը և հավատքը աներկբա, որ «Տերն իր ժողովրդին զորություն պիտի տա և իր ժողովրդին պիտի օրհնի խաղաղություն պարգևելով»: Աղոթք ենք վերառաքում, որ Աստուծո Սուրբ Աջը հովանի և պահապան լինի ձեզ և պարգևի ապահով ծառայություն հայրենյաց խաղաղ եզերքներում: Թող ձեր հավատքը` որպես վահան ամրության, ձեզ պաշտպանի փորձություններից ու նեղություններից և Աստուծո շնորհները առատացնի ձեր կյանքում:
Թող Բարձրյալն Աստված առատապես օրհնի մեր երկիրը, խաղաղություն ու զորություն պարգևի համայն մեր ժողովրդին` կառուցելու շեն ու բարգավաճ մեր հայրենիքը և իրագործելու ազգային մեր իղձերը:
Շնորհք, սէր և խաղաղութիւն Տեառն մերոյ Յիսուսի Քրիստոսի եղիցին ընդ ձեզ և ընդ ամենեսեան. ամէն։
Օրհնությամբ՝
ԳԱՐԵԳԻՆ Բ
ԿԱԹՈՂԻԿՈՍ ԱՄԵՆԱՅՆ ՀԱՅՈՑ
Տուաւ Կոնդակս ի 28-ն Յունուարի
յամի Տեառն 2017 և ի թուին հայոց ՌՆԿԶ
ի մայրավանս Սրբոյ Էջմիածնի
ընդ համարաւ 999
Կոնդակի ընթերցումից հետո, հանդիսապետությամբ Ամենայն Հայոց Կաթողիկոսի, կատարվեց Հանրապետական մաղթանք, որի ժամանակ առ Աստված միասնական աղոթք բարձրացվեց Հայրենիքի բարօրության, Հայոց քաջարի բանակի անսասանության և հայրենյաց սահմանների անառիկության համար:
Ապա Գևորգյան հոգևոր ճեմարանի հանդիսությունների դահլիճում տեղի ունեցավ պաշտոնական ընդունելություն, որի ժամանակ կատարվեց նաև պարգևաբաշխություն:
Ի գնահատություն Հայրենիքին մատուցած ծառայությունների` Ամենայն Հայոց Կաթողիկոսը, Տ. Վրթանես եպիսկոպոս Աբրահամյանի միջնորդությամբ, Հայ Եկեղեցու «Սուրբ Ներսես Շնորհալի» պատվո բարձր շքանշանի արժանացրեց մի շարք զինվորականների:
«Էջ Միածինն ի Հօրէ» շարականի երգեցողության ներքո ներս բերվեց Հայրապետական Սրբատառ կոնդակը, որն ընթերցեց Մայր Աթոռի Քրիստոնեական դաստիարակության կենտրոնի տնօրեն Գերաշնորհ Տ. Վարդան եպիսկոպոս Նավասարդյանը:
Ամենայն Հայոց Կաթողիկոսը կոնդակի ընթերցումից հետո «Սուրբ Ներսես Շնորհալի» շքանշան հանձնեց ՀՀ ՊՆ ԳՇ պետի աշխատակազմի ղեկավար, գեներալ-մայոր Արիս Բրուտյանին, ՊԲ հրամանատարի 1-ին տեղակալ-շտաբի պետ, գեներալ-մայոր Կամո Վարդանյանին, ՀՀ ԶՈՒ ԳՇ օպերատիվ վարչության պետ, գեներալ-մայոր Արտակ Դավթյանին, ՊԲ հրամանատարի 1-ին տեղակալ գեներալ-մայոր Միքայել Արզումանյանին, ՊԲ դիվիզիայի հրամանատարի տեղակալ գնդապետ Արարատ Մելքումյանին, ՊԲ զինվորական կոմիսար գնդապետ Մխիթար Ավշարյանին, ՊԲ դիվիզիայի հրամանատարի տեղակալ գնդապետ Նորայր Ասլանյանին, 3-րդ ԲԿ հրամանատար գնդապետ Գրիգորի Խաչատուրովին, ՀՀ ՊՆ ՊՔ վարչության պետ Լևոն Այվազյանին:
ՀՀ ԶՈՒ կազմավորման 25-րդ տարեդարձի առիթով ՀՀ Պաշտպանության նախարարի հրամանով պարգևների արժանացան նաև բարձրաստիճան եկեղեցականներ:
«Անդրանիկ Օզանյան» մեդալով պարգևատրվեցին Արմավիրի թեմի առաջնորդ Գերաշնորհ Տ. Սիոն եպիսկոպոս Ադամյանը, Դամասկոսի հայոց թեմի առաջնորդ Գերաշնորհ Տ. Արմաշ եպիսկոպոս Նալբանդյանը, ԵՊՀ Աստվածաբանության ֆակուլտետի դեկան, Երևանի Ս. Գրիգոր Լուսավորիչ մայր եկեղեցու հոգևոր տեսուչ Գերաշնորհ Տ. Անուշավան եպիսկոպոս Ժամկոչյանը, Վանորեից տեսուչ Գերաշնորհ Տ. Արտակ եպիսկոպոս Տիգրանյանը, Արագածոտնի թեմի առաջնորդ Գերաշնորհ Տ. Մկրտիչ եպիսկոպոս Պռոշյանը, Մեծ Բրիտանիայի և Իռլանդիայի հայոց թեմի առաջնորդ Գերաշնորհ Տ. Հովակիմ եպիսկոպոս Մանուկյանը, Մայր Աթոռ Սուրբ Էջմիածնի հոգևոր-կրթական բարձրագույն հաստատությունների վերատեսուչ Գերաշնորհ Տ. Գևորգ եպիսկոպոս Սարոյանը, Մայր Աթոռ Սուրբ Էջմիածնի Վարչա-տնտեսական բաժնի տնօրեն Գերաշնորհ Տ. Մուշեղ եպիսկոպոս Բաբայանը, Մայր Աթոռ Սուրբ Էջմիածնի լուսարարապետ Գերաշնորհ Տ. Հովնան եպիսկոպոս Հակոբյանը, Կանադայի հայոց թեմի առաջնորդ Գերաշնորհ Տ. Աբգար եպիսկոպոս Հովակիմյանը, Մայր Աթոռ Սուրբ Էջմիածնի Քրիստոնեական դաստիարակության կենտրոնի տնօրեն Գերաշնորհ Տ. Վարդան եպիսկոպոս Նավասարդյանը: «Գարեգին Նժդեհ» մեդալ հանձնվեց Սյունյաց թեմի առաջնորդական տեղապահ Հոգեշնորհ Տ. Մակար վարդապետ Հակոբյանին:
Շնորհաբաշխությունից հետո Գարեգին Բ Ամենայն Հայոց Հայրապետը վերստին իր օրհնության ու գնահատանքի խոսքը բերեց ՀՀ ԶՈՒ բարձրագույն սպայակազմին` մաղթելով, որ միշտ հաղթական լինի Հայոց բանակը:
Տեղի ունեցավ նաև «Եռաբլուր» զինվորական պանթեոնում հանգչող հայորդիներին նվիրված «Հուշամատյան ոգեշնչման» գրքի շնորհանդեսը:
Տեղեկատվական համակարգ
Մայր Աթոռ Ս. Էջմիածին
Հայաստանյայց Առաքելական Ս. Եկեղեցի
