Հունվարի 28-ին «Դեբատ» ակումբում կայացած քննարկման ժամանակ հնչած քննադատությունների մեծ մասն ուղղված էր ՀՀԿ-ին, ընտրական օրենսգրքին եւ ապրիլի 2-ը խորհրդարանական ընտրությունների օր նշանակելուն:
Քննարկմանը ներկա ՀՀ նախկին սոցապնախարար, ՀՀԿ-ական Ռազմիկ Մարտիրոսյանն ասաց, թե ապրիլի 2-ի ընտրությունը չէր կապի ցուրտ եղանակի հետ, ինչպես դա արել է ԱԱԾ պետի նախկին տեղակալ Գուրգեն Եղիազարյանը, այլապես այդ տրամաբանությամբ ամենամեծ քաղաքական գործիչը Գագիկ Սուրենյանը կլիներ: Նա չհամաձայնեց մյուս բանախոսների այն կարծիքներին, թե նոր ձեւավորվելիք խորհրդարանն ավելի վատն է լինելու կամ ԳԽ-ի հետ համեմատած գնալով մակարդակն ընկել է:
«Ես չեմ ուզում զբաղվել կուսակցական քարոզչությամբ, քանի որ մեր ընկերները արդեն Հանրապետական կուսակցության քարոզիչները դարձան: Նրանք բանավեճի ժամանակ ներշնչեցին հասարակությանը, որ միեւնույն է` ՀՀԿ-ն հաղթելու է: Նույն բանը տեղի ունեցավ նաեւ ԱՄՆ-ում… Սոցիոլոգիայում կա հերոսի եւ հակահերոսի հասկացություն: Երբ հակահերոսի դոզան շատ է լինում, հասարակական գիտակցության մեջ տեղերը փոխվում են:
Որպես օրինակ, Պուտինի սինդրոմը: Երբ Ամերիկայում Քլինթոնի, Օբամայի մակարդակով սկսեցին չափից շատ հրեշի կերպար ստեղծել, հասարակական գիտակցության մեջ` նույն արեւմտյան, հերոսի եւ հակահերոսի տեղերը փոխվեցին: Նույն պարագայում, հիմա ես էլ անելիք չունեմ, որովհետեւ դուք արդեն այս փոքրիկ բանավեճում ներշնչեցիք, որ միեւնույն է Հանրապետականը մնալու է իշխանության»,-ասաց պարոն Մարտիրոսյանը:
Կարդացեք նաև
Գոհար ՀԱԿՈԲՅԱՆ
