Այսօր Բանակի տոնի կապակցությամբ Եռաբլուր էին այցելել ՀՀ բարձրաստիճան պաշտոնյաները՝ ՀՀ եւ ԼՂՀ նախագահներ Սերժ Սարգսյանի, Բակո Սահակյանի գլխավորությամբ: Սերժ Սարգսյանը շնորհավորեց բոլորին՝ տոնի կապակցությամբ, հարգանքի տուրք մատուցեց զոհվածների հիշատակին, խոնարհվեց Վազգեն Սարգսյանի շիրիմի առջեւ:
Ինչպես միշտ, Եռաբլուրում բազմաթիվ քաղաքացիների էին հավաքվել՝ նամակները ձեռքներին եւ սպասում էին Սերժ Սարգսյանին: Նախագահը լսեց նրանցից մի քանիսին եւ հուսադրեց՝ մենք ձեր հարցերով կզբաղվենք:
Կարդացեք նաև
Մի կին սկսեց Սերժ Սարգսյանի հետեւից բղավել, թե պարոն նախագահ, չե՞ք լսում, մի հատ էստե՛ղ նայեք: Սերժ Սարգսյանը շրջվեց եւ արձագանքեց. «Հանգիստ, կռիվ մի՛ արեք»: Կինը մեղմացրեց տոնը եւ ասաց՝ կռիվ չեմ անում: Նա չէր կարողանում իրեն հատկացված կարճ վայրկյանների ընթացքում բացատրել, թե ինչ է ուզում. «Ձեր ցավը տանեմ, դուք միշտ…ես խնդրում եմ ձեզ…դուք անձամբ լուծում տվեք, նամակը տվել եմ այն տղային»: Բողոքող կինը վստահեցրեց, որ շատ շնորհակալ է Սերժ Սարգսյանից. «Բոլոր Մանուկյան, Մարտիրոսյանները միշտ գոհ են ձեզանից»: Սերժ Սարգսյանը կնոջը շնորհակալություն հայտնեց:
Ուշագրավ է, որ այդ թեժ պահին ՀՀԿ-ի տատիկը մոտեցավ նախագահին ու փորձեց համբուրել: Սերժ Սարգսյանը թույլ չտվեց՝ ասելով, որ դրա տեղը չէ, ժամանակը չէ:
Ավելի ուշ մենք ՀՀԿ-ի տատիկին հարցրեցինք՝ շա՞տ նեղացավ, որ Սերժ Սարգսյանը թույլ չտվեց համբուրել իրեն: Նա պատասխանեց, որ Սերժ Սարգսյանը միշտ ճիշտ է, իրոք, դրա տեղը չէր, ժամանակը չէր. «Ես մեծ կնիկ եմ, կարող է չհասկացա մի պահ: Բայց ես պաչելու համար չեմ նեղվում: Ես Սերժ Սարգսյանին միշտ համբուրում եմ, ամեն օր եմ նրան համբուրում իմ աղոթքներում»:
Հռիփսիմե ՋԵԲԵՋՅԱՆ
