Ծաղկաձորում անցկացրած երկշաբաթյա ուսումնամարզական հավաքից հետո հունահռոմեական ըմբշամարտի Հայաստանի ազգային հավաքականի վեց ըմբիշներ մեկնել են Ֆրանսիա, որտեղ այսօր մեկնարկում է միջազգային ներկայացուցչական մրցաշար: Դա մեր թիմի առաջին միջազգային մեկնարկն է լինելու նոր մրցաշրջանում:
Գլխավոր մարզիչ Լեւոն Ջուլֆալակյանի՝ Փարիզ մեկնած թիմում են Գեւորգ Ղարիբյանը՝ 59 կգ քաշային կարգ, Կարեն Ասլանյանը՝ 66 կգ, Ռաֆայել Ալեքսանյանը՝ 71 կգ, Կարապետ Չալյանը՝ 75 կգ, Մաքսիմ Մանուկյանը՝ 85 կգ եւ օլիմպիական չեմպիոն, 98 կգ քաշային Արթուր Ալեքսանյանը:
Երեկ ըմբիշներն անցել էին կշռման արարողությունը եւ սպասում էին վիճակահանությանը: Սակայն ուշ երեկոյան մրցաշարի պաշտոնական կայքում Արթուր Ալեքսանյանի անունը 98 կգ քաշայինների ցուցակում բացակայում էր: Aravot.am-ը փորձեց կապվել Փարիզի հետ, բայց չստացվեց: Այնուամենայնիվ, մեր չճշտված տեղեկություններով Արթուր Ալեքսանյանը մի թեթեւ մրսել է եւ մարզիչները որոշել են, որ նա մրցագորգ չմտնի:
Աշոտ ՀԱԿՈԲՅԱՆ
Կարդացեք նաև
Լուսանկարը՝ Armedia.am-ի
